खोची-पेठवडगाव एसटी फेऱ्या पुर्ववत सुरू कराव्यात, प्रवाशांची मागणी

खोची, भेंडवडे परिसरातील
बंद बस पुन्हा सुरू करण्याची मागणी
खोची : उन्हाळी सुटी काळात बंद बस सेवेच्या फेऱ्या पुन्हा सुरू करा, बंद खोची मुक्काम बस सेवा पुन्हा चालू करा, अशी मागणी खोची, भेंडवडे परिसरातील विद्यार्थी, कामगार, महिला आणि प्रवासी यांनी केली आहे. शैक्षणिक नुकसान टाळण्यासाठी कार्यवाही तत्काळ करण्याची मागणी विद्यार्थ्यांतून होत आहे.
दरवर्षी विद्यार्थ्यांच्या सुटीच्‍या कालावधीत खोची-पेठवडगाव मार्गावर धावणाऱ्या बस सेवेच्या फेऱ्या कमी केल्या जातात.
शाळा सुरू होताच पुन्हा त्या पूर्ववत केल्या जातात; परंतु शाळा, महाविद्यालय सुरू झाले तरी अजूनही बस बस सेवा वेळापत्रकानुसार सुरू नाही. त्यातच काही फेऱ्या आणि मुक्काम अचानक बंद केले आहेत. खोची बस थांबा येथे तीन बस मुक्कामासाठी होत्या. यातील दोन बस भेंडवडेमार्गे वडगाव धावत होत्या. तर एक बस बुवाचे वठार सावर्डेमार्गे पेठवडगाव प्रवाशांच्या सेवेत होती. सध्या भेंडवडेमार्गाचे दोन्ही मुक्काम बंद केले आहेत. या मार्गावरील सर्व फेऱ्या विस्कळीत झाल्या आहेत. यामुळे भेंडवडे, लाटवडे येथील प्रवाशांचे हाल होत आहेत. सध्या सुरू असणारा बुवाचे वाठारमार्गे मुक्काम सेवेमुळे प्रतिप्रवासी पाच रुपयांचा भुर्दंड आणि ३५ मिनिटांचा ज्यादा वेळ खर्च करावा लागत आहे. बस फेऱ्यांमधून प्रवास करणाऱ्यांची संख्या जास्त आहे. त्यामुळे खोची पेठवडगाव, भेंडवडेमार्गे धावणाऱ्या बसच्या फेऱ्या पूर्ण क्षमतेने पुन्हा सुरू कराव्यात. मुक्काम बस सुरू करून कामगारांची, विद्यार्थ्यांची गैरसोय टाळावी. कोल्हापूर बस आगाराच्या व्यवस्थापकांनी, लोकप्रतिनिधींनी लक्ष द्यावे, अशी मागणी केली जात आहे.