ऊस पिकाला ''घोळी''चा विळखा ऊस उत्पादक चिंतेत : पिकाच्या वाढीवर गंभीर परिणाम.

05515

ऊस पिकाला ''घोळी''चा विळखा
भुदरगड तालुका ः पिकाच्या वाढीवर गंभीर परिणाम

अरविंद सुतार : सकाळ वृत्तसेवा

कोनवडे, ता. २ : ऊस पिकाला घोळी नावाच्या तणाचा फटका बसत असून उसाच्या वाढीवर त्याचा गंभीर परिणाम होत आहे. शेतीच्या बांधांवर व रस्त्यावर शेतकऱ्यांनी काढून टाकलेल्या या तणाचे ढीग दिसत असून भुदरगड तालुक्यातील कूर, मिणचे, हेदवडेसह परिसरात निम्म्याहून अधिक क्षेत्रांत या तणाचा प्रादुर्भाव झाला आहे.
भुदरगड तालुक्यात ऊस व भात पीक मोठ्या प्रमाणात घेतले जाते. तालुक्यात सुमारे ७३०० हेक्टरहून अधिक ऊस पिकाचे क्षेत्र आहे. ऊस हातात रोकड उपलब्ध करून देणारे पीक आणि कमी कष्टात उत्पादनाची हमी असल्याने दिवसेंदिवस या पिकाच्या लागवडीत सातत्याने वाढच होत आहे. त्यातच वेदगंगा, फये प्रकल्प, दूधगंगा कालव्याचे पाणी उपलब्ध झाल्याने या प्रकल्पांमुळे बारमाही पाणी उपलब्ध झाले आहे. एकीकडे चित्र असताना पिकात शेतकरी तोट्यात आला आहे. निम्मा खर्च ऊस भांगलन करण्यात जात आहे. वर्षभरात मावा, तांबेरा या रोगांच्या प्रादुर्भावाबरोबरच आता घोळी, मालवीय, खांडेकोळी नावाच्या तणाचा प्रादुर्भाव दिवसेंदिवस वाढू लागला आहे. विशेषतः फेब्रुवारी, मार्च, एप्रिल महिन्यात या तणाची वाढ झपाट्याने होताना दिसते, जमिनीला चिकटूनच ती पसरते. त्यामुळे मुळासकट काढून टाकणे शेतकऱ्यांना अशक्य बनते. काढून टाकलेली एक जरी कांडी राहिली आणि ती पूर्ण सुकलेली असेल, तरीही ऊस शेतात वाढलेले ''घोळी'' तण. ती शेतात पाणी दिल्यावर झपाट्याने वाढते. विशेषतः लागण आणि तोड झालेल्या उसाच्या वाढीसाठी हाच काळ पोषक असल्याने नेमक्या याच कालावधीत ही वनस्पती फोफावत आहे. उसाच्या वाढीसाठी त्रासदायक असली तरी अनेक शेतकरी भाजी म्हणून तिचा वापर करतात शेतकऱ्याच्या तब्येतीला पोषक असणारी ''घोळी'' उसाचे व बळीराजाचे आर्थिक गणित मात्र बिघडवू लागली आहे हे निश्चित.
---
कोट :
मशागतीवर होणारा खर्च, वीज बिल आणि मिळणारा दर यांचे गणित पूर्णतः कोलमडले आहे. त्यातच ऊस पिकाच्या वाढीच्या नेमक्या कालावधीतच घोळी व अन्य तणाची उगवण होत असून पिकाच्या वाढीवर मोठा परिणाम होत आहे.
- नंदिनी लोकरे, कोनवडे