हरिओमनगर कचरा

81433

हरिओमनगर परिसरातील माळ
बनत आहे कचऱ्याचे डंपिंग ग्राऊंड

कोल्हापूर, ता. ८ ः हरिओमनगर परिसरातील रिकामा माळ कचऱ्याचे डंपिंग ग्राऊंड बनले आहे. येथे परताळ्यातील तसेच इतर ठिकाणचा कचरा टाकला जात असल्याने प्रचंड दुर्गंधी सुटली आहे. परिसरातील नागरिकांनी महापालिकेच्या आरोग्य निरीक्षकांकडे तक्रारी करूनही कचरा टाकण्याचे थांबवले जात नसल्याने आरोग्याचा प्रश्‍न निर्माण झाला आहे.
शालिनी सिनेटोनच्या परिसरात असलेला माळ व लाड मळ्याजवळील खाण ही कचरा टाकण्याचे ठिकाण बनले आहे. रंकाळा पदपथाच्या रस्त्याजवळ असलेल्या या ठिकाणामुळे दररोज दोन ते तीन डंपर विविध प्रकारचा कचरा येथे आणून टाकला जात आहे. येथे नवीन अपार्टमेंट उभारल्या आहेत. त्या नागरिकांना कचऱ्याच्या दुर्गंधीचा प्रचंड त्रास होत आहे. काही जागा खासगी असली तरी तिथे कचरा टाकला जाऊ नये म्हणून अनेकवेळा नागरिकांनी तक्रारी केल्या होत्या. त्यानंतर काही काळ कचरा बंद झाला होता. पण, आजपासून पुन्हा कचरा टाकला जात आहे. तसेच महापालिकेच्या वतीने परताळ्यातील गाळ व झुडुपे स्वच्छ केली जात आहेत. तो सर्व कचराही आता या परिसरात टाकला जात आहे. यापूर्वी इराणी खण स्वच्छ करताना त्यातीलही कचरा टाकण्यासाठी ही जागा वापरली होती. यामुळे परिसरात प्रचंड दुर्गंधी सुटली असून लहान मुले, ज्येष्ठ नागरिक आजारी पडण्याचे प्रमाण वाढत आहे. परिसरातील नागरिकांनी येथे कचरा टाकण्यास महापालिकेने मज्जाव करावा अशी मागणी केली आहे.