राजर्षी शाहू व्याख्यानमाला

राजर्षी शाहू व्याख्यानमाला बुधवारपासून ः रेखावार

सकाळ वृत्तसेवा
कोल्हापूर, ता. १४ : राजर्षी शाहू छत्रपती मेमोरियल ट्रस्टतर्फे राजर्षी शाहू महाराजांच्या १४९ व्या जयंतीनिमित्त विविध विषयांवरील राजर्षी शाहू व्याख्यानमालेचे आयोजन केले आहे. दसरा चौकातील शाहू स्मारक भवन येथे २१ ते २५ दरम्यान सायंकाळी ६ वाजता व्याख्यान होईल. बुधवारी (ता. २१) ‘सकाळ माध्यम समूहा’चे संपादक-संचालक श्रीराम पवार यांचे ‘रशिया-युक्रेन युद्ध व त्याचे परिणाम’ या विषयावरील व्याख्यानाने या व्याख्यानमालेला सुरवात होणार असल्याची माहिती जिल्हाधिकारी राहुल रेखावार यांनी दिली.
रेखावार म्हणाले, ‘गुरुवारी (ता. २२) डॉ. विलास पवार यांचे ‘राजर्षी शाहू महाराजांच्या प्रशासकीय सुधारणा’ या विषयावर व्याख्यान होईल. डॉ. अवनिश पाटील अध्यक्षस्थानी असतील. शुक्रवारी (२३) प्रा. जी. ए. उगले (पैठण) यांचे ‘सत्यशोधक समाज ः काल, आज आणि उद्या’ या विषयावर व्याख्यान होईल. अध्यक्षस्थानी डॉ. जयसिंगराव पवार असतील. शनिवारी (२४) किशोर बेडकिहाळ (सातारा) यांचे ‘महर्षी विठ्ठल रामजी शिंदे यांच्या विचारांचे समकालीन महत्त्व’ या विषयावर व्याख्यान होईल. अध्यक्षस्थानी प्रा. रणधीर शिंदे असतील. रविवारी (२५) डॉ. शिवाजी पाटील (सातारा) यांचे ‘भारतीय राज्यघटनेचा मूलभूत संरचना सिद्धांत आणि लोकशाही’ या विषयावर व्याख्यान होईल. ही सर्व व्याख्याने समाजोपयोगी आहेत. त्यामुळे सर्वच स्तरातील लोकांनी या व्याख्यानाचा लाभ घ्यावा, असे आवाहन रेखावार यांनी केले आहे.