‘अकरावी’ला अर्ज करण्यास उरले दोन दिवस

‘अकरावी’ला अर्ज करण्यास उरले दोन दिवस
आतापर्यंत ३३८६ विद्यार्थ्यांची नोंदणी; कृषी तंत्र पदविकासाठी ३० जूनपर्यंत मुदत

सकाळ वृत्तसेवा
कोल्हापूर, ता. १६ ः शहरस्तरीय अकरावीच्या केंद्रीय प्रवेश प्रक्रियेंतर्गत ऑनलाईन अर्ज करण्यास दोन दिवसांची मुदत उरली आहे. रविवार (ता. १८) सायंकाळी पाच वाजेपर्यंत विद्यार्थ्यांना अर्ज करता येणार आहेत. त्यानंतर प्रवेश प्रक्रिया समितीकडून अर्जांच्या छाननीची प्रक्रिया सुरू होणार आहे.
या प्रक्रियेंतर्गत शुक्रवारी सायंकाळीपर्यंत एकूण ३,३८६ विद्यार्थ्यांनी ऑनलाईन अर्ज केले आहेत. त्यात विज्ञान विद्याशाखेच्या २,६३९, तर वाणिज्य इंग्रजी माध्यमाच्या ७४७ विद्यार्थ्यांचा समावेश आहे. एसएससी बोर्डाव्यतिरिक्त अन्य बोर्डाच्या विद्यार्थ्यांनी मुख्य केंद्र कमला कॉलेज येथून गुण समकक्ष करून प्रवेश अर्ज भरावा. ऑनलाईन अर्जांच्या छाननीची प्रक्रिया सोमवार ते गुरुवारपर्यंत चालणार आहे. दरम्यान, महात्मा फुले कृषी विद्यापीठातर्फे (राहुरी) दहावीनंतर दोन वर्षे मुदतीच्या मराठी माध्यमातील कृषी तंत्रपदविका अभ्यासक्रमाची प्रवेश प्रक्रिया राबविण्यात येत आहे. या प्रक्रियेंतर्गत ऑनलाईन अर्ज करण्याची मुदत ३० जूनपर्यंत आहे. जिल्ह्यातील शाहू कृषी तंत्र विद्यालय (कसबा बावडा), शासकीय अनुदानित कृषी तंत्रविद्यालय, तळसंदे, कागल, दत्तवाड, परिते, कणेरीमठ, कसबा तारळे येथे विनाअनुदानित तत्त्वावर अभ्यासक्रम उपलब्ध आहे.

चौकट
पदवी परीक्षेत कॉपी करताना ११ जण सापडले
विविध ११ पदवी अभ्यासक्रमांच्या परीक्षा आज झाल्या. त्यासाठी १०,७६४ विद्यार्थी उपस्थित होते. या परीक्षेदरम्यान कॉपी करताना ११ विद्यार्थी भरारी पथकाला सापडले. त्यात कोल्हापूर जिल्ह्यातील ६, सांगलीमधील २ आणि सातारा जिल्ह्यातील ३ विद्यार्थ्यांचा समावेश आहे. विविध सहा अभ्यासक्रमांचे निकाल जाहीर केले आहेत.