‘संजय गांधी’ अनुदानात वाढ

‘संजय गांधी’ अनुदानात वाढ
इचलकरंजी, ता. ६ ः संजय गांधी निराधार अनुदान योजना आणि श्रावणबाळ सेवा राज्य निवृत्तीवेतन योजना अंतर्गत सर्वच लाभार्थ्यांच्या अनुदानात केलेल्या ५०० रुपये वाढ संदर्भातील अध्यादेश राज्याच्या सामाजिक न्याय व विशेष सहाय्य विभागाने दिला आहे. त्यामुळे लाभार्थ्यांना आता १ हजार रुपये ऐवजी दरमहा १५०० रुपये अनुदान मिळणार आहे. याबाबत आमदार प्रकाश आवाडे यांनी पाठपुरावा केला होता.
राज्य शासनाने २०२३-२४ च्या अर्थसंकल्पीय अधिवेशनात संजय गांधी व श्रावणबाळ योजनेतील पात्र लाभार्थ्यांच्या अर्थसहाय्य १ हजारवरून १५०० रुपये करण्याचा म्हणजेच अनुदानात ५०० रुपयांची वाढ करण्याची घोषणा केली होती. २८ जून रोजी झालेल्या मंत्रिमंडळाच्या बैठकीत त्यास मान्यता दिली होती. त्यानुसार ५ जुलै रोजी सामाजिक न्याय व विशेष सहाय्य विभागातर्फे संजय गांधी निराधार अनुदान योजना व श्रावणबाळ सेवा राज्य निवृत्तीवेतन योजना अंतर्गत सर्वच लाभार्थ्यांचे अनुदान १ हजारवरून १५०० रुपये करण्यात येत असल्याचा अध्यादेश कार्यासन अधिकारी प्रशांत पुं. वाघ यांनी दिला आहे.