एसटी चालकांचा सत्कार

विनाअपघात सेवा देणाऱ्या
एसटी चालकांचा सत्कार

कोल्हापूर, ता. १८ ः सुरक्षित प्रवासाची खात्री देणाऱ्या एसटी महामंडळात सलग पाच ते पंचवीस वर्षे विनाअपघात सेवा बजावलेल्या एसटी चालकांचा सपत्नीक सत्कार विभाग नियंत्रक अनघा बारटक्के यांच्या हस्ते नुकताच करण्यात आला. विभागीय कार्यालयात हा सत्कार झाला.
एका दिवसात लाखो प्रवाशांची वाहतूक करण्यासाठी एसटी महामंडळाची बससेवा तत्पर आहे. गर्दीतून, अरूंद रस्त्यावरून, महामार्गावरून तसेच घाटमाथ्यावरून अशा अनेक अवघड कोंडीतून सुरक्षितपणे एसटी चालविण्याचे काम चालक करतात. एका वेळी पन्नास प्रवाशांनी भरलेली बस विविध अडथळे ओलांडून इच्छितस्थळी सुरक्षित प्रवास घडविण्यात या चालकांचा मोलाचा वाटा असतो. अशा चालकांना शाबासकीची थाप म्हणून प्रत्येक आगारातील विनाअपघात सेवा देणाऱ्या चालकांचे दरवर्षी सत्कार होतात. यंदाही विभाग नियंत्रक श्रीमती बारटक्के यांच्या हस्ते असे सत्कार झाले.
एसटी चालवताना सलग २५ वर्षे विनाअपघात सेवा दिल्याबद्दल जयकुमार माळगे (कोल्हापूर), शशिकांत बरकाळे, शिवाजी पाटील (गारगोटी), अशोक मर्णहोळकर (चंदगड), निशिकांत साठे (कुरूंदवाड), विद्यानंद घोरपडे (कागल), तानाजी पाटील, सदाशिव सुतार, श्रीकांत पोवार (राधानगरी) यांचा सत्कार करण्यात आला. यावेळी एसटीच्या विविध विभागांचे प्रमुख तसेच अधिकारी, कर्मचारी उपस्थित होते.
संभाजीनगर एसटी आगारातील वाहक अमोल आळवेकर हे गिर्यारोहक आहेत. एसटी महामंडळात सेवा बजावून ते गिर्यारोहणाचा छंदही जोपासतात. त्यांनी हिमालयातील १९ हजार ६२६ फूट उंचीचे हनुमान तिब्बा शिखर नुकतेच सर केले. तसेच संताराम जाधव यांना कामगार कल्याण मंडळाचा गुणवंत कामगार पुरस्कार लाभल्याबद्दल या दोन्ही कर्मचाऱ्यांचे बारटक्के यांच्या हस्ते विशेष सत्कार करण्यात आले.