मराठा समाज

सकल मराठा समाज
जिल्हाधिकाऱ्यांना जाब विचारणार

कोल्हापूर, ता. १८ : ‘उपमुख्यमंत्री अजित पवार यांच्यासमोर मराठा आरक्षणप्रश्नी दोन समाजांमध्ये भेद निर्माण करणारे वक्तव्य करणाऱ्या अधिकाऱ्याने तोंड सांभाळून बोलावे. हा अधिकारी मराठा आरक्षणासाठी रक्त सांडलेल्या तरुणांचा अवमान करत आहे. त्यामुळे, अशा अधिकाऱ्याचा बोलवता धनी कोण? याचा जाब विचारण्यासाठी तसेच समाजभान नसणाऱ्या अधिकाऱ्यावर तत्काळ कारवाई करावी, या मागणीसाठी मंगळवारी (ता. २२) सकल मराठा समाज, कोल्हापूर शहर सर्वपक्षीय समिती व शिवसेनेचे (उध्दव ठाकरे) पदाधिकारी जिल्हाधिकाऱ्यांना जाब विचाण्यासाठी धडक देणार असल्याची माहिती या संघटनांनी प्रसिध्दी पत्रकाद्वारे दिली आहे.
प्रसिध्दी पत्रकात म्हटले आहे, स्वातंत्र्यदिनानिमित्त उपमुख्यमंत्री अजित पवार यांच्या समवेत मराठा आरक्षणासंदर्भात चर्चा करण्यासाठी एक शिष्टमंडळ मोठ्या अपेक्षेने गेले होते. चर्चा सुरू असताना एका वरिष्ठ अधिकाऱ्याने दोन समाजांमध्ये भेद निर्माण करणारा सल्ला दिला. आरक्षण संदर्भात न्यायिक लढा सुरू आहे. त्यामुळे, अशा पात्रता आणि समाजभान नसलेल्या अधिकाऱ्यावर उपमुख्यमंत्र्यांनी कठोर कारवाई केली पाहिजे. दोन समाजामध्ये तेढ निर्माण करण्याचा हेतू संबंधित अधिकाऱ्याचा आहे का? त्याच्यामागील खरा सूत्रधार कोण आहे? हे गृहखात्याने तपासणे महत्वाचे आहे. मराठा समाज सनदशीर मार्गाने आपल्या हक्काचे आरक्षण मिळावे, यासाठी लढा देत आहे. यामध्ये एखादा अधिकारी दोन समाजात तेढ निर्माण करत असेल तर त्या अधिकाऱ्याला भविष्यात योग्य धडा शिकवला जाईल. पत्रकावर ॲड. बाबा इंदुलकर, दिलीप देसाई, आर. के. पोवार, शिवसेनेचे संजय पवार, विजय देवणे, रविकिरण इंगवले व सुनील मोदी यांची नावे आहेत.
...
प्रतिकात्मक पुतळे जाळले जातील
अधिकाऱ्यांनी मराठा आणि ओबीसीमध्ये वाद निर्माण केल्यास अशा अधिकाऱ्यांचे राज्यातील प्रत्येक जिल्ह्यांमध्ये प्रतिकात्मक पुतळे जाळले जातील, याचे भान ठेवावे, असाही इशारा मराठा संघटना व अन्य पक्षांनी दिला आहे.