आमदार जाधव पाहणी

24944

आमच्या कामाचे श्रेय घेऊ नका
जयश्री जाधव ः हुतात्मा पार्कची केली पाहणी

कोल्हापूर, ता. २१ ः कोल्हापूरकरांची दिशाभूल करण्याऐवजी निधी मंजूर करून आणण्याचा अधिकार असेल तर त्यांनी शहराच्या विकासासाठी नवीन प्रकल्पाचे प्रस्ताव तयार करावेत. निधीसाठी पाठपुरावा करून तो मंजूर करून आणून श्रेय घ्यावे, असे मत आमदार जयश्री जाधव यांनी व्यक्त केले.
आमदार जाधव यांनी हुतात्मा पार्कला भेट देऊन तिथे आलेल्या नागरिकांशी संवाद साधला. महापालिका अधिकारी व ठेकेदारांची आढावा बैठक घेतली. त्यावेळी त्या बोलत होत्या. तसेच सुशोभीकरणाचे काम दिवाळीपूर्वी पूर्ण करावे अशी सूचनाही केली.
आमदार जाधव म्हणाल्या, ‘‘हुतात्मा पार्क व महावीर गार्डनच्या सुशोभीकरणाचा आराखडा दिवंगत आमदार चंद्रकांत जाधव यांनी तयार केला.तत्कालीन पालकमंत्री सतेज पाटील यांनी दोन टप्प्यात जिल्हा नियोजनमधून निधी मंजूर केला. पण जनतेने नाकारलेले त्याचे श्रेय घेत आहेत. त्यांनी दिशाभूल करू नये.
दिवंगत आमदार जाधव यांनी शहरातील सर्व मैदाने व क्रीडांगणाचा विकास झाला पाहिजे यासाठी आराखडे तयार करून घेतले. गांधी मैदान, दुधाळी पॅव्हेलियन, बावडा पॅव्हेलियन, सासने मैदान, शिवाजी स्टेडियम, महावीर गार्डन, हुतात्मा पार्क, रस्ते (नगरोत्थान योजना), रंकाळा या कामांसाठी निधी मिळवण्याचा पाठपुरावा सुरू होता. त्यांना निधी मिळून आता कामे सुरू होत आहेत. तिथे जाऊन आपणच पाठपुरावा केला, असे दाखवण्याचा खटाटोप काहीजण करीत आहेत.’
शहर अभियंता हर्षजीत घाटगे, सुरेश पाटील, आर्किटेक्ट प्रशांत हडकर, माजी नगरसेवक विनायक फाळके, बाळासाहेब निचिते, पांडुरंग पाटील, चंद्रकांत कांडेकरी, शहानुर देसाई, बॉबी सांगलीकर, नंदकिशोर देशपांडे, मुनीर मोमीन, रावसाहेब शिंदे, नंदकुमार नलवडे, शिवाजी नलवडे, इनायतुला गडकरी, मारुतीराव चौगुले, राम डवाळे, दिनकर मगदूम आदी उपस्थित होते.