स्कूल ऑफ नॅनोसायन्सचे १५ विद्यार्थी उच्चशिक्षणासाठी परदेशी

स्कूल ऑफ नॅनोसायन्सचे
१५ विद्यार्थी उच्चशिक्षणासाठी परदेशी

कोल्हापूर, ता. २२ : शिवाजी विद्यापीठाच्या स्कूल ऑफ नॅनोसायन्स अँड बायोटेक्नॉलॉजीचे १५ विद्यार्थी-विद्यार्थिनी पीएच.डी.सह विविध अभ्यासक्रमांच्या उच्चशिक्षणासाठी परदेशातील शैक्षणिक संस्थांकडे रवाना झाले आहेत. अवघ्या दशकभराच्या वाटचालीमध्ये विभागाने हे यश मिळविले आहे.
विद्यापीठात सन २०१२-१३ मध्ये सुरू झालेल्या या नव्या अधिविभागातून आजपर्यंत ५७ पेक्षा अधिक विद्यार्थी पीएच.डी.च्या संशोधनासाठी, तर दहापेक्षा अधिक विद्यार्थी पदव्युत्तर शिक्षणासाठी आणि पाच विद्यार्थी पोस्ट डॉक्टरेट रिसर्च स्टडीजसाठी परदेशातल्या नामांकित आणि प्रतिष्ठित शैक्षणिक संस्था आणि विद्यापीठांमध्ये गेले आहेत. यंदाच्या वर्षीदेखील ‘स्कूल ऑफ नॅनोसायन्स’चे ११ विद्यार्थी पीएच.डी., दोन विद्यार्थी पोस्ट-डॉक्टरेट रिसर्च, तर दोन विद्यार्थी पदव्युत्तर पदवीसाठी ऑस्ट्रेलिया, जर्मनी, झेक रिपब्लिक, इंग्लंड तसेच दक्षिण कोरिया या देशांमधील नामांकित विद्यापीठांकडे रवाना झाले आहेत. त्यात पीएच.डी.चे विद्यार्थी प्रज्ञा पाटील, अभिषेक कुलकर्णी (ऑस्ट्रेलिया), भक्ती जाधव, अंकिता निकम, आदर्श पाटील, आशिष कणसे, रोहन हगवणे, अभिषेक चव्हाण, योगेश डांगे, ओंकार पाटील (दक्षिण कोरिया), अपूर्वा वडणगेकर (झेक रिपब्लिक), पोस्ट डॉक्टरल रिसर्चसाठीचे विद्यार्थी डॉ. सोमनाथ कुंडले, स्नेहल पाटील (दक्षिण कोरिया) आणि पदव्युत्तर पदवीसाठीचे विद्यार्थी वैभवी जाधव (जर्मनी), विनायक निर्मळे (इंग्लंड) यांचा समावेश आहे. त्यांना ‘स्कूल ऑफ नॅनोसायन्स’चे संचालक डॉ. किरण कुमार शर्मा यांच्यासह प्राध्यापकांचे मार्गदर्शन लाभले.