थेट पाईपलाईनचे पाणी सुरू

47961
...

‘थेट पाईपलाईन’ चा पंप सुरू
प्रशासक के. मंजुलक्ष्मी यांच्याकडून पाहणी ः ई वॉर्डला पाणी वितरण

कोल्हापूर, ता. २८ : थेट पाईपलाईन योजनेच्या वीजपुरवठ्यातील तांत्रिक बिघाड दुरूस्त केल्यानंतर आज दुपारी एकपासून थेट पाईपलाईन योजनेतील एक पंप सुरू झाला. रात्रीपासून त्याचे पाणी ई वॉर्डमध्ये वितरण केले जाणार आहे. तसेच दुसरा पंपही लवकर सुरू केला जाणार आहे.
दरम्यान, आज बिद्री उपकेंद्रात तसेच उपसा केंद्राजवळील उपकेंद्राच्या ठिकाणची प्रशासक के.मंजुलक्ष्मी यांनी पाहणी केली. त्यांनी दोन्ही पंप लवकर सुरू करण्याच्या सूचना जलअभियंता नेत्रदीप सरनोबत यांना दिल्या. दोन पंप सुरू झाल्यानंतर १४० एमएलडी पाणी मिळणार आहे. त्यामुळे या दोन पंपांवरच संपूर्ण पाणीपुरवठा होण्याची शक्यता आहे.
दहा नोव्हेंबरपासून योजनेतील एक पंप सुरू असून त्यातून आलेले पाणी ई वॉर्डला दिले जात होते. काळम्मावाडी येथील उपकेंद्र, तसेच बिद्री येथील उपकेंद्रात तांत्रिक बिघाड झाल्याने तो उपसा पंप दोन दिवस बंद ठेवावा लागला. त्यामुळे ई वॉर्डला शिंगणापूर योजनेमधून पाणी दिले जात होते. प्रशासकांनी दिलेल्या सुचनेनुसार उपसा केंद्रातील दुरुस्तीचे काम आज पुर्ण होऊन पहिला पंप दुपारी एक वाजता सुरू करण्यात आला. दुसऱ्या पंपासाठीही उपसा केंद्रात तयारी केली आहे. उद्यापर्यंत दुसरा पंप सुरू होऊ शकतो. त्यानंतर ई वॉर्डबरोबरच ए, बी वॉर्डमध्येही पाणी देण्याचे नियोजन आहे. शाखा अभियंता संजय नागरगोजे पाहणीवेळी उपस्थित होते.