आजऱ्यात नाताळची जय्यत तयारी

आजऱ्यात नाताळची जय्यत तयारी
चर्चवर रोषणाई ः चार दिवस कोरल साँग कार्यक्रम
सकाळ वृत्तसेवा
आजरा, ता. २४ ः दरवर्षीप्रमाणे यंदाही आजरा तालुक्यात नाताळची जय्यत तयारी केली आहे. आजरा, गवसे, वाटंगी येथील चर्चवर विद्युत रोषणाई केली आहे. यानिमित्त विविध धार्मिक व सांस्कृतिक कार्यक्रमांचे आयोजन केले आहे. ख्रिस्ती बांधव नाताळच्या तयारीत मग्न आहेत. यंदाही नाताळ उत्साहात साजरा केला जाणार आहे.
३ डिसेंबरपासून याची तयारी सुरु झाली आहे. चार दिवस कोरल साँग (नाताळची गाणी) कार्यक्रम घेण्यात आला. दाभिल, शेळप, गवसे, खेडगे, धनगरमोळा, मलिग्रे, भादवण, हालेवाडी, पेरणोली, साळगाव, वाटंगी, मोरेवाडी, खानापूर, गांधीनगर, आजरा शहरातील चर्च गल्लीमध्ये नाताळची गाणी झाली. कार्यक्रमाला आजरा पॅरिस काऊन्सिलचे सदस्य, तरूण, तरुणी, चिमुकले, गायनवृंद सहभागी झाले होते. चर्चचे पॅरिश प्रिश्ट फादर मेल्विन पायस, रोझरी चर्चचे प्राचार्य फादर अॅथनी डिसोझा यामध्ये सहभागी झाले होते. त्यांच्या मार्गदर्शनाखाली धार्मिक, सांस्कृतिक व विविध उपक्रम राबवले जाणार आहेत. येशू ख्रिस्त जन्माचा देखावा, स्टार चांदणी बनवण्याची स्पर्धा, वैयक्तिक गायन (कॅरल सिंगिग) स्पर्धा घेण्यात येणार आहेत.