संत बाळूमामा देवस्थान गैरव्यवहारसंदर्भात मंगळवारी मोर्चा

संत बाळूमामा देवस्थान
गैरव्यवहारसंदर्भात मंगळवारी मोर्चा
महाराष्ट्र मंदिर महासंघातर्फे आयोजन
सकाळ वृत्तसेवा
कोल्हापूर, ता. २३ : आदमापूर (ता. भुदरगड) येथील संत बाळूमामा मंदिर देवस्थानातील गैरव्यवहाराची त्वरित ‘सीआयडी’ चौकशी करावी, या मागणीसाठी महाराष्ट्र मंदिर महासंघातर्फे मंगळवारी (ता.२७) जिल्हाधिकारी कार्यालयावर मोर्चा काढण्यात येणार आहे.
शाहूपुरी येथील राधाकृष्ण मंदिर येथे मोर्चाच्या नियोजनासाठी बैठक आयोजित करण्यात आली होती. यावेळी हिंदु एकता आंदोलनाचे जिल्हाध्यक्ष दीपक देसाई, शिवसेना (शिंदे गट) उपजिल्हाप्रमुख उदय भोसले, शिवसेना (उद्धव ठाकरे गट) चे उपशहरप्रमुख शशिकांत बिडकर, पतित पावन संघटनेचे जिल्हाध्यक्ष आप्पासाहेब बन्नेवार, शिवशाही फाऊंडेशनचे संस्थापक सुनील सामंत, अखिल भारत हिंदू महासभेचे जिल्हाध्यक्ष संदीप सासने, महाराष्ट्र मंदिर महासंघाचे प्रमोद सावंत, हिंदु जनजागृती समितीचे शिवानंद स्वामी यांच्यासह आनंदराव पवळ, प्रतिभा तावरे, रामभाऊ मेथे उपस्थित होते. ‘हा मोर्चा मंगळवारी सकाळी ११ वाजता दसरा चौक येथून सुरु होऊन व्हिनस कॉर्नरमार्गे जिल्हाधिकारी कार्यालय येथे नेण्यात येईल’, असे मंदिर महासंघाचे समन्वयक सुनील घनवट यांनी सांगितले.