Kolhapur Loksabha : कोल्हापूर, हातकणंगलेच्या जागांबाबत तिढा कायम; महायुतीकडून मंडलिक, घाटगे, महाडिकांचं नाव चर्चेत

कोल्हापूर : भाजपने काल (बुधवार) लोकसभा उमेदवारांची दुसरी यादी प्रसिद्ध केली. त्यात मात्र कोल्हापूर (Kolhapur) वा हातकणंगले मतदारसंघाचा समावेश नाही. त्यामुळे या दोन्ही जागांचा तिढा कायम असल्याचे स्पष्ट झाले आहे. दोन्ही जागा महायुतीमधील कोणत्या पक्षाकडे जाणार याची उत्सुकता त्यामुळे ताणली गेली आहे.

दुसरीकडे यामुळे कार्यकर्त्यांमध्येही चलबिचलता आहे. महायुतीकडून (Mahayuti) संजय मंडलिक (Sanjay Mandlik), समरजित घाटगे, धनंजय महाडिक यांची नावे कोल्हापूर मतदारसंघातून चर्चेत आहेत, तर हातकणंगलेमधून धैर्यशील माने, विनय कोरे, शौमिका महाडिक यांची नावे चर्चेत आहेत.

कोल्हापूरचे खासदार संजय मंडलिक आहेत; मात्र ही जागा भाजपने मागितली आहे. हातकणंगलेच्या जागेवरही भाजपने दावा सांगितला आहे. या दोन्ही जागांबद्दल मुंबईत सातत्याने चर्चा सुरू आहेत, मात्र कोणताही निर्णय झालेला नाही.

एका बाजूला भाजप समरजितराजे घाटगे यांना कमळ चिन्हावर लोकसभेच्या रिंगणात उतरवेल, अशी चर्चा आहे. दुसरीकडे उमेदवारी मलाच मिळेल आणि गेल्या निवडणुकीपेक्षा जास्त मते घेऊन निवडून येऊ, असा दावा खासदार संजय मंडलिक यांनी व्यक्त केला आहे.