चंबुखडी टाकीच्या पाईपला व्हॉल्व गळती

व्हॉल्‍व्‍ह गळतीची डोकेदुखी
मुख्य जलवाहिनीचे जोड काम झाले तरी समस्या कायम
सकाळ वृत्तसेवा
कोल्हापूर, ता. २ : शहरातील सी व डी वॉर्डसाठी पुईखडीवरून चंबुखडीला थेट जलवाहिनीचे पाणी नेणाऱ्या पाईपवरील व्हॉल्‍व्‍हची गळती डोकेदुखी ठरत आहे. मुख्य जलवाहिनीच्या जोडाचे काम झाले आहे. पण, ही गळती दुरुस्ती करावी लागणार असल्याने जलवाहिनी सुरू करण्यात आली नाही.
थेट पाईपलाईनचे पाणी आता केवळ सी व डी वॉर्डला देणे शिल्लक आहे. त्यासाठी पूर्वी शिंगणापूर योजनेतून अशुद्ध पाणी पुईखडीला नेणारी पाईप आता थेट पाईपलाईनचे शुद्ध पाणी पुईखडीवरून चंबुखडीला नेण्यासाठी वापरण्यात येणार आहे. त्यासाठी फुलेवाडी जकात नाक्याजवळ त्या पाईपचा जोड चंबुखडीकडे जाणाऱ्या पाईपला देण्याचे काम बरेच दिवस चालले. तसेच चंबुखडी टाकीत पाणी टाकण्याचे कामही करण्यात आले. त्यानंतर गेल्या आठवड्यात ती पाईप स्वच्छ करण्यासाठी पाणी घेण्यात आले. या पाईपलाईनवरील दोन व्हॉल्‍व्‍हमधून गळती असून, तिची दुरुस्ती आवश्‍यक आहे. तरच या पाईपमधून पुरेसे पाणी चंबुखडी टाकीत मिळणार आहे. त्यासाठी एक दिवस पाणी बंद ठेवावे लागणार आहे. सध्या निवडणुकीमुळे ती दुरुस्ती पुढे ढकलली आहे. निवडणुकीनंतर ही दुरुस्ती करून घेतली जाणार आहे. यानंतर पुईखडीवरून शुद्ध पाणी चंबुखडी टाकीत टाकण्यात येणार आहे. यासाठी पुढील आठवडा जाण्याची शक्यता आहे.
--------------
चौकट
२६ कोटी आदा झाल्यानंतर योजना पूर्ण
थेट पाईपलाईन योजनेसाठी ४८८ कोटींचा निधी मंजूर होता. त्यातून टप्प्याटप्प्याने काम पूर्ण होईल त्याप्रमाणे ठेकेदार कंपनीला बिलाची रक्कम आदा केली जात आहे. आता कामाचा शेवटचा टप्पा बाकी असून, त्यानंतर २६ कोटींच्या आसपास रक्कम आदा केली जाणार आहे. काम पूर्ण झाल्यानंतर प्रशासकांच्या मंजुरीनंतर ही रक्कम दिली जाईल. त्यानंतर योजनेचे काम पूर्ण झाले, असे समजण्यात येणार आहे. तसेच त्यानंतर पाच वर्षे देखभाल दुरुस्तीची जबाबदारी संबंधित ठेकेदार कंपनीवर आहे.