निर्भय वॉक

फोटो-83065

डॉ. नरेंद्र दाभोलकर यांना अभिवादन
अंधश्रद्धा निर्मूलन समितीतर्फे निर्भय वॉक उपक्रम

सकाळ वृत्तसेवा
कोल्हापूर, ता. १२ ः शहीद डॉ. नरेंद्र दाभोलकर यांना अभिवादन करत आज शहरातून महाराष्ट्र अंधश्रद्धा निर्मूलन समितीतर्फे निर्भय वॉक उपक्रम झाला. दाभोलकर खून खटल्याचा निकाल शुक्रवारी (ता.१०) लागला. डॉ. दाभोलकरांवर गोळ्या चालवणाऱ्या सचिन अंदुरे आणि शरद कळसकर यांना जन्मठेपेची शिक्षा, तर खुनाचे सूत्रधार म्हणून आरोप असणाऱ्या डॉ. वीरेंद्र तावडे, विक्रम भावे यांना आणि ॲड. संजीव पुनाळेकर याला पुरावे नष्ट करण्याच्या आरोपांमधून सबळ पुरावे सादर न केल्यामुळे निर्दोष मुक्त करण्यात आले. या पार्श्वभूमीवर बिंदू चौक, मिरजकर तिकटी, बिनखांबी गणेश मंदिर, महाद्वार रोड ते पापाची तिकटी या मार्गावर निर्भय मॉर्निंग वॉक झाला.
बिंदू चौकातील महात्मा फुले आणि डॉ. बाबासाहेब आंबेडकर यांच्या पुतळ्यांना अभिवादन करून निर्भय मॉर्निंग वॉकची सुरुवात झाली. समितीचे जिल्हा अध्यक्ष डॉ. बी. एम. हिर्डेकर, प्राचार्य डॉ. टी. एस. पाटील, दिलीप पवार, संभाजीराव जगदाळे, प्रा. सुभाष जाधव यांच्या हस्ते पापाची तिकटी येथील महात्मा गांधी यांच्या पुतळ्याला पुष्पहार घालून निर्भय मॉर्निंग वॉकचा समारोप झाला. यावेळी महाराष्ट्र अंधश्रद्धा निर्मूलन समितीच्या कार्यकर्त्यांनी सांस्कृतिक अभिव्यक्तीच्या माध्यमातून केलेल्या वेगवेगळ्या उपक्रमांत त्यांना मिळालेले मानधन हे डॉ. दाभोलकर यांचा विचार वाढवण्यासाठी आणि रुजवण्यासाठी संघटनेला प्रदान केले. जिल्हा कार्याध्यक्ष रेश्मा खाडे यांनी आभार मानले. यावेळी रामदास देसाई, प्रा. मांतेश हिरेमठ, राजवैभव शोभा रामचंद्र, तनिष्क जगतकर, स्वाती कृष्णात, कपिल मुळे, तनुजा शिपूरकर, कृष्णात स्वाती, अभिषेक मिठारी आदी उपस्थित होते.