गड- ग्रामदैवतावर वीज

खमलेहट्टीत मंदिरावर कडाडली वीज

इलेक्ट्रिक संच जळाल्याने नुकसान
सकाळ वृत्तसेवा
गडहिंग्लज, ता. १२ ः खमलेहट्टी (ता. गडहिंग्लज) येथील ग्रामदैवत श्री महादेवाच्या मंदिरावर काल (ता. ११) सायंकाळी वीज कडाडली. या घटनेत कोणतीही जीवितहानी झाली नसली, तरी मंदिरातील संपूर्ण इलेक्ट्रिक संच जळाल्याने मंदिर अंधारात आहे. ‘महावितरण’ व महसूल खात्याकडून भरपाई मिळावी, अशी मागणी ग्रामस्थांनी केली आहे.
तालुक्याच्या पूर्वेला असणारे खमलेहट्टी छोटेसे गाव. जरळी, मुगळी, खमलेहट्टी व परिसराला काल सायंकाळी वळिवाच्या पावसाने झोडपून काढले. विजांच्या कडकडाटात तब्बल दोन तास पडलेल्या पावसाने सर्वत्र पाणीच पाणी झाले. वादळी वारे आणि विजांमुळे नागरिकांत भीतीचे वातावरण होते. दरम्यान, खमलेहट्टीचे ग्रामदैवत महादेव मंदिराच्या शिखरावर वीज कडाडली. शिखराच्या बांधकामाला या विजेने कोणताही धोका पोहोचला नसला तरी तेथून येणारी वीजजोडणीची केबल मात्र खाक झाली आहे. तसेच वीज मीटर, मेन स्वीच, फ्यूज, मंदिरातील संपूर्ण वायरिंग जळून लाखांचे नुकसान झाले आहे.
दरम्यान, लोकवर्गणीतून झालेल्या मंदिरातील विजेचा संच संपूर्ण जळाल्याने मंदिर अंधारात आहे. तेव्हा तातडीने आपत्ती व्यवस्थापनाच्या निधीतून महावितरण व महसूल विभागाने या नुकसान भरपाई देण्याची गरज नागरिकांतून व्यक्त होत आहे. तलाठी व ग्रामपंचायतीने या नुकसानीची पाहणी करून भरपाईची लेखी मागणी केली आहे.