पंचगंगा नदीत उडी घेतलेल्याचा शोध सूरू

बेपत्ता व्यक्तीचा
पंचगंगा पात्रात शोध
कोल्हापूर ः शास्त्रीनगरातून सहा मे रोजी बेपत्ता झालेल्या तरुणाचे कपडे शनिवारी पंचगंगा नदीकाठीवर मिळून आले. त्याने नदीत उडी मारली असावी का? अशी शंका आल्याने पोलिसांनी अग्निशमन दलाच्या मदतीने रविवारी दिवसभर नदीपात्रात शोधमोहीम राबविली. मात्र, हाती काही लागले नाही.
शास्त्रीनगर येथील ४३ वर्षीय तरुण सहा मे रोजी सायंकाळी घरातून निघून गेला. त्याचे कुटुंबीय त्याचा शोध घेत होते. अशातच पंचगंगा नदी काठावर त्याचे कपडे नातेवाईकांना मिळून आल्याने त्यांनी याची माहिती पोलिसांना दिली. यानंतर रविवारी सकाळी ११ वाजता बोटीसह नदीपात्रात शोधमोहीम राबविण्यात आली. ही शोधमोहीम दुपारनंतर थांबविण्यात आली. बेपत्ताची नोंद राजारामपुरी पोलिसांत झाली असून बेपत्ता तरूरुणाचा शोध सुरू आहे.
...
गळफास घेऊन
वृद्धाची आत्महत्या
कोल्हापूर ः जुनी मोरे कॉलनी येथील खाशाबा महादेव सुतार (वय ७५) यांनी राहत्या घरी गळफास घेऊन आत्महत्या केली. रविवारी सकाळी सातच्या सुमारास हा प्रकार उघडकीस आला. याची नोंद जुना राजवाडा पोलिस ठाण्यात करण्यात आली.
...
बांधकामावरून पडून
कामगाराचा मृत्यू
कोल्हापूर ः साळोखेनगरातील एका शैक्षणिक संस्थेच्या बांधकामावरून पडून जखमी झालेल्या परप्रांतीय कामगाराचा मृत्यू झाला. कन्हैयालाल जगमोहन (वय ३२, रा. बलरामपूर, उत्तरप्रदेश) असे मृताचे नाव आहे. बांधकामावरून पडल्याने त्याच्यावर खासगी रुग्णालयात उपचार सुरू होते. उपचारादरम्यान रविवारी सायंकाळी सातच्या सुमारास त्याचा मृत्यू झाला. याची नोंद जुना राजवाडा पोलिस ठाण्यात झाली.