सावकारांच्या मारहाणीत रिक्षा चालकाचा मृत्यू

85522
राकेश माने

सावकाराच्या मारहाणीत
रिक्षा चालकाचा मृत्यू

तीस हजारांसाठी सहा जणांनी उचलून नेले

सकाळ वृत्तसेवा
कोल्हापूर, ता. २३ : हातउसणे घेतलेल्या पैशांसाठी रिक्षाचालकाला उचलून नेऊन सहा जणांनी केलेल्या बेदम मारहाणीत त्याचा मृत्यू झाल्याचा प्रकार उघडकीस आला. मंगळवारी (ता. २१) रात्री मारहाण करून राकेश दत्तात्रय माने (वय ४२, रा. जोशी गल्ली, विक्रमनगर) या रिक्षाचालकाला उचगावनजीक फेकून संशयित पसार झाले होते. त्याच्यावर उपचारही करण्यात आले. मात्र, त्याचा गुरुवारी (ता. २३) मृत्यू झाला. राकेशच्या मृत्यूला जबाबदार सहा जणांविरोधात राजारामपुरी पोलिसांत गुन्हा दाखल करण्याचे काम सुरू होते. ३० हजार रुपयांसाठी राकेशची रिक्षा काढून घेत ही मारहाण झाल्याचे त्याचा भाऊ रोशन माने याने पोलिसांना सांगितले.
फिर्यादी रोशन माने याने पोलिसांना दिलेली माहिती अशी, राकेश माने हा पत्नी, मुलगी यांच्‍यासोबत विक्रमनगरात राहण्यास आहे. काही महिन्यांपूर्वी त्याने आजारपणात खासगी सावकारांकडून हातउसणे पैसे घेतले होते. यानंतर तो पुन्हा रिक्षा चालवू लागला. त्यासाठी भाऊ रोशनने बॅंकेचे कर्ज काढून त्याला नवी रिक्षा घेऊन दिली. पण, राकेशने घेतलेल्या ३० हजार रुपयांसाठी खासगी सावकाराचा तगादा सुरू होता.
मंगळवारी रात्री साडेदहाच्या सुमारास त्याला सहा जणांनी घरातून बोलावून नेले होते. उचगावनजीक नेऊन त्याला बेदम मारहाण करण्यात आली. यानंतर त्याला तावडे हॉटेल चौकात जखमी अवस्थेत टाकून सहा संशयित पसार झाले. पहाटेच्या सुमारास याची माहिती रोशन याला समजली. त्याने जखमी राकेशला घेऊन बुधवारी गांधीनगर पोलिस ठाणे गाठले. त्यावेळी जखमीला उपचारासाठी गांधीनगर वसाहत रुग्णालयात नेण्यास सांगण्यात आले. उपचारांनंतर राकेश घरी निघून गेला होता. मात्र, गुरुवारी त्याला पुन्हा त्रास जाणवू लागल्याने सीपीआरमध्ये आणले असता, त्याचा उपचारादरम्यान मृत्यू झाला.

गांधीनगर पोलिसांची दिरंगाई...
जखमी राकेशला घेऊन त्याचा भाऊ बुधवारी गांधीनगर पोलिस ठाण्यात गेला होता. बराच वेळ थांबूनही त्यांची फिर्याद नोंदविण्यात आली नव्हती. ठाणे अंमलदाराने जखमीला उपचारासाठी रुग्णालयात पाठविले; परंतु यानंतर गुन्ह्याची नोंद झाली नव्हती. गुरुवारी जखमी पुन्हा सीपीआर रुग्णालयात दाखल झाला. त्याची प्रकृती गंभीर बनल्याने प्रभारी अधिकारी दीपक जाधव स्वतः सीपीआरमध्ये दाखल झाले. ठाणे अंमलदारांनी याची गांभीर्याने दखल घेतली असती तर बुधवारीच जखमीचा जबाब नोंदविता आला असता, अशी चर्चा सुरू होती.