गड- गॅसवरील वाहनावर कारवाई

घरगुती गॅसवरील रिक्षांवर
गडहिंग्लजमध्ये कारवाई
गडहिंग्लज, ता. ५ ः घरगुती गॅस वापरून प्रवासी वाहतूक करणाऱ्या दोन रिक्षांवर पोलिसांनी आज कारवाई केली. पोलिसांच्या फिर्यादीवरून रिक्षाचालक राकेश रामदास कदम (३२, रा. काळभैरी रोड, गडहिंग्लज) व महादेव नागाप्पा चौगुले (५२, लिंगनूर कसबा नूल, ता. गडहिंग्लज) यांच्या विरोधात गुन्हा दाखल करण्यात आला आहे. दसरा चौकात ही कारवाई करण्यात आली.
कदम याची रिक्षा (एमएच ०७, एस ७०२६) व चौगुलेची रिक्षा (एमएच ०९, बीए १०५५) घरगुती स्वयंपाकाच्या गॅसवर सुरू असल्याचे सहायक फौजदार सुहास शिंदे व कॉन्स्टेबल मधुकर संकपाळ यांना समजले. त्यानुसार संबंधित रिक्षांची तपासणी केली असता पेट्रोलवरील रिक्षाच्या इंजिनमध्ये बदल करून त्यात गॅसकिट वापरल्याचे निदर्शनास आले. याद्वारे स्वतःच्या व प्रवाशांच्या जीवितास धोका उत्पन्न होण्याची शक्यता असल्याने दोघांवरही याप्रकरणी कारवाई करण्यात आल्याचे पोलिसांनी सांगितले.