पोलिसवृत्त

अपघातातील जखमीचा मृत्यू
कोल्हापूर ः गोकुळ शिरगाव बायपास रोडवर झालेल्या अपघातातील जखमी शशिकांत पांडुरंग कांबळे (वय ४६, रा. गोकुळ शिरगाव) यांचा मृत्यू झाला. मंगळवारी रात्री साडेआठच्या सुमारास हा अपघात घडला होता. सीपीआरमध्ये उपचारादरम्यान गुरुवारी रात्री त्यांचा मृत्यू झाला. याची नोंद सीपीआर पोलिस चौकीत झाली.
...
कात्यायनी पार्कात
एकास मारहाण
कोल्हापूर ः घराजवळ संशयास्पदरीत्या फिरणाऱ्यांना विचारणा केली असता अरुण वसंत नाईक (वय ५८, रा. कात्यायनी पार्क, कळंबा) यांना मारहाण करण्यात आली. गुरुवारी रात्री दहाच्या सुमारास हा प्रकार घडला. दोघा संशयितांनी धारदार हत्याराने हल्ला केल्याचे जखमीने पोलिसांना सांगितले. जखमीला उपचारासाठी सीपीआरमध्ये दाखल करण्यात आले. याची नोंद सीपीआर पोलिस चौकीत झाली.
...
दुचाकी घसरून
तिघे जखमी
कोल्हापूर ः भादोले (ता. हातकणंगले) नजीक दुचाकी अपघातात तीन भाविक जखमी झाले. आदमापूर येथे देवदर्शन करून सर्वजण घरी परतत होते. कृष्णा मोहन कराडे (वय २४), राजेश मधुकर दमाणे (३०), दत्तात्रय महादेव जावीर (३०, तिघे रा. पलूस, सांगली) अशी जखमींची नावे आहेत. गुरुवारी रात्री दहाच्या सुमारास हा अपघात घडला. जखमींना उपचारासाठी सीपीआरमध्ये दाखल करण्यात आले.