आजरा ः टस्कराचा वाटंगीत धुमाकूळ

88919, 88920
वाटंगी (ता. आजरा) ः टस्कराने फेकलेला छकडा. दुसऱ्या छायाचित्रात ढकलून टाकलेल्या दुचाकी.
...
टस्कराने केले बैलगाडीचे खेळणे
वाटंगीमध्ये टस्कराचा धुमाकूळ ः दुचाकीचेही नुकसान
सकाळ वृत्तसेवा
आजरा, ता. ८ ः वाटंगी (ता. आजरा) येथे टस्काराने चांगलाच धुमाकूळ घातला. त्याने बैलगाडी सोंडेने उचलून दूरवर फेकून दिली. घराच्या दारात लावलेल्या दुचाकी ढकलून नुकसान केले. यामुळे वाटंगी गावासह परिसरात भीतीचे वातावरण पसरले आहे.
चाळोबा जंगल परिसरात वावरणाऱ्या टस्कराने तालुक्याच्या पूर्व भागात मोर्चा वळवला आहे. वाटंगी व चितळे परिसरात टस्कर वावरत आहे. आज शनिवारी पहाटेच्या सुमाराला टस्कर वाटंगी-मोरेवाडी मार्गावर आला. तो पुंडलिक नाईक यांच्या घराजवळ गेला. तेथे काही वेळ फेरफटका मारल्यावर त्याने दाराजवळ ठेवलेली बैलगाडी सोंडेने उचलली व दूरवर फेकून दिली. त्याचबरोबर त्याने दारात लावलेल्या मोटारसायकली सोंडेने व पायाने ढकलून दिल्या. त्याने परिसरात धुमाकूळ घातला. पहाटे परत तो मोरेवाडीच्या जंगल परिसरात गेला आहे. त्याच्या पायाचे ठसे मिळालेले आहेत. पुंडलिक नाईक यांच्या बैलगाडीसह दुचाकी व संभाजी देसाई यांच्या दुचाकीचे नुकसान झाले आहे. आजरा तालुक्यात पावसाळी वातावरण तयार झाले आहे. शेतकरीवर्ग शेतीच्या कामात व्यस्त आहेत. ऐन खरीप हंगामात टस्कर वाटंगी परिसरात येऊन धुमाकूळ घालत असल्याने ग्रामस्थांमध्ये भीतीचे वातावरण पसरले आहे.