राष्ट्रीय नेमबाजी स्पर्धेत शाहू मानेचा सुवर्णासह कांस्य वेध

89287
शाहू माने
...
राष्ट्रीय नेमबाजी स्पर्धेत
शाहू मानेचा सुवर्णासह कांस्य वेध

सकाळ वृत्तसेवा
कोल्हापूर, ता. १० ः भोपाळ येथे सुरू असलेल्या २२ व्या कुमार सुरेंद्र सिंग राष्ट्रीय अजिंक्यपद नेमबाजी स्पर्धेत कोल्हापूरचा आंतरराष्ट्रीय नेमबाज शाहू माने याने दहा मीटर एअर रायफल प्रकारात सुवर्ण, तर ५० मीटर प्रोन प्रकारात कांस्यपदकाची कमाई केली. तो या प्रकारात प्रथमच सहभागी झाला होता.
शाहूने दहा मीटर एअर रायफल प्रकारात प्रतिस्पर्धी खेळाडूवर ६३१.३ गुणांचा वेध घेऊन अंतिम फेरी गाठली. अंतिम फेरीत त्याने प्रतिस्पर्ध्यावर तीन गुणांची आघाडी घेत दहा मीटर एअर रायफल प्रकारात सुवर्णपदक पटकावले. प्रथमच त्याने ५० मीटर प्रोन प्रकारात ५७२ गुणांचा वेध घेत कांस्य पदकाला गवसणी घातली. पन्नास मीटर थ्री पोझिशनमध्ये त्याने ५७२ गुणांचा वेध घेतला. मात्र, त्याला २९ व्या क्रमांकावर समाधान मानावे लागले. सध्या तो ऑलिंपियन गगन नारंग यांच्या गन ॲन्ड ग्लोरी अकादमीत सराव करीत आहे, तर मध्य रेल्वेच्या पुणे विभागात कार्यरत आहे. यासह तो शिक्षणानिमित्त के.आय.टी. कॉलेजमध्ये मेकॅनिकल विभागात तृतीय वर्षात शिकत आहे. त्याला मंत्री चंद्रकांत पाटील, अध्यक्ष सुनील कुलकर्णी, उपाध्यक्ष साजीद हुदली, सचिव दीपक चौगुले, संचालक डॉ. मोहन वनरोटी, डॉ. एम.एम. मुजुमदार, डॉ. उदय भापकर यांचे प्रोत्साहन लाभले.
............