पोलीस वृत्त

नागवेत पैशासाठी वृद्धाला
मुलगा, नातवाकडून मारहाण

सकाळ वृत्तसेवा
चंदगड, ता. १० ः नागवे (ता. चंदगड) येथील सुभाष नारायण पाटील (वय ७०) यांना त्यांचा मुलगा मारुती सुभाष पाटील, नातू महेश व दोन अनोळखी व्यक्तींनी लाकडाने मारहाण करून गंभीर जखमी केले. गुरुवारी (ता. ६) दुपारी साडेतीनच्या सुमारास हा प्रकार घडला. सुभाष पाटील हे घरासमोर बसले असताना त्यांचा मुलगा संशयित मारुती, नातू महेश व अन्य दोघे तिथे आले. मारुती याने आपल्याला पैशाची गरज आहे असे म्हणून पैशाची मागणी केली. त्यांनी आपल्याकडे पैसे नाहीत, असे म्हटल्यावर शिवीगाळ करू लागला. घरासमोर जळणासाठी ठेवलेले लाकूड घेऊन मारहाण करू लागला म्हणून सुभाष यांनी घरात जाऊन दार बंद केल्यावर लाथा-बुक्या मारून व कोयत्याने दरवाजावर वार करून दार मोडले. आत घुसून लाकडाने त्यांना मारहाण केली. यात त्यांचा डावा हात दुखावला. नातू महेश याने त्यांच्या डाव्या पायाच्या पिंडरीवर कोयत्याने वार करुरून जखमी केले. अन्य दोघा अनोळखींनी लाथा-बुक्यांनी मारहाण केल्याचे सुभाष यांनी दिलेल्या फिर्यादीत म्हटले आहे.