इचल : आंदोलनाचा इशारा

वीसपर्यंत चौकशी अहवाल
न पाठविल्यास आंदोलन

इचलकरंजी, ता. ५ : इचलकरंजी महापालिका प्राथमिक शिक्षण विभागातील नियमबाह्य प्रशासनाधिकारी व पर्यवेक्षक नियुक्तीसंदर्भात २० जुलैपर्यंत चौकशी करून अहवाल न पाठविल्यास शिक्षण उपसंचालक कार्यालयासमोर आंदोलन करण्याचा इशारा ‘आप’चे अभिषेक पाटील यांनी दिला.
इचलकरंजी महापालिका प्राथमिक शिक्षण विभागातील प्रशासनाधिकारी पदाची जबाबदारी ही शाळांचे नियंत्रण व कार्यभार सुरळीतपणे सुरू ठेवण्याची असते. मात्र, महापालिका आयुक्तांनी एका इचलकरंजी प्राथमिक शाळेतील मुख्याधापकाकडे अतिरिक्त प्रशासनाधिकारी पदाचा कार्यभार सोपविला आहे. अतिरिक्त प्रशासनाधिकारी नियुक्ती नियमबाह्य पद्धतीने केली आहे. नियुक्ती करताना सेवाज्येष्ठतेचा विचार न करता स्वतःच्या मर्जीतील कनिष्ठ मुख्याधापकाची नियुक्ती केली आहे. याबाबत कोल्हापूर येथील शिक्षण उपसंचालक कार्यालयास निवेदन देऊन नियमबाह्य प्रशासनाधिकारी व पर्यवेक्षक नियुक्तीच्या चौकशीची मागणी केली होती. निवेदनास चार महिने उलटले तरी देखीलही शिक्षण उपसंचालकांकडून कोणतीही चौकशी वा कारवाई केलेली नाही. त्यामुळे प्रशासनाधिकारी व पर्यवेक्षक निवडीसंदर्भात २० जुलै पर्यंत चौकशी करून अहवाल न पाठविल्यास शिक्षण उपसंचालक कार्यालयासमोर आंदोलन करू, असा इशारा निवेदनाद्वारे दिला आहे. याप्रसंगी संतोष पोवार, कुणाल बागडे, किरण ओव्हळ, अक्षय थोरे, राहुल मिणेकर आदी उपस्थित होते.