मी जवाहरनगरचा राजा, तुमची वर्दीच उतरवतो

‘मी जवाहरनगरचा भाई, तुमची वर्दीच उतरवतो’
बिंदू चौक सबजेलमध्ये बंद्याची पोलिसाला धमकी

सकाळ वृत्तसेवा
कोल्हापूर, ता. ७ ः बिंदू चौक सबजेलमधील बंद्याची माहिती घेणाऱ्या पोलिस कर्मचाऱ्याला दमदाटीचा प्रकार घडला. ‘तुम्हाला कशाला पाहिजे माहिती, बाहेर भेटा तुम्हाला बघून घेतो. मी जवाहरनगरचा भाई आहे, तुमची वर्दीच उतरवतो,’ असा दम देणाऱ्या साजीद ऊर्फ फिरोज अल्लाबक्ष शेख (रा. जवाहरनगर) याच्यावर गुन्हा दाखल करण्यात आला. रविवारी सकाळी अकराच्या सुमारास हा प्रकार घडला.
बिंदू चौक सबजेलमधील पोलिस शिपाई इजाज अब्दुल रहीम शेख व सुभेदार रवींद्र पाटील हे आज सकाळी सबजेलमधील दवाखान्यात बंद्यांची माहिती घेत होते. दाखल कैद्यांना असणारे आजार, त्यांची शारीरिक मोजमापे घेण्याचे काम सुरू असताना न्यायाधीन बंदी साजिद ऊर्फ फिरोज शेख याने पोलिसांना माहिती दिली नाही. पोलिसांना शिवागाळ करत, ‘तुम्हाला कशाला पाहिजे माहिती? तुम्ही बाहेर भेटा, तुम्हाला बघून घेतो. मी जवाहरनगरचा भाई आहे. तुमची वर्दी उतरवतो,’ अशी धमकी दिली. पोलिसांना असहकार्य करीत स्वतःचे काहीतरी बरे-वाईट करून घेण्याची भीतीही तो पोलिसांना घालत होता. याबाबत पोलिसांनी त्याच्याविरोधात जुना राजवाडा पोलिसांत फिर्याद देत सरकारी कामात अडथळा आणल्याचा गुन्हा नोंदवला.