इचल : बदली करण्याची मागणी

07476

समुपदेशक महिलेची
बदली करण्याची मागणी

इचलकरंजी, ता. २७ : खातरजमा करण्यापूर्वी गर्भवतीस एचआयव्ही पॉझिटिव्ह असल्याचे सांगत पूर्ण कुटुंबाची चाचणी करण्यासाठी भाग पडणाऱ्या समुपदेशक महिलेची बदली करावी, या मागणीचे निवेदन माजी नगरसेवक मनोज साळुंखे यांनी आयजीएम रुग्णालयाचे वैद्यकीय अधिकारी डॉ. नंदकुमार बनगे यांना दिले. याप्रकरणी कारवाई न झाल्यास आंदोलनाचा इशाराही साळुंखे यांनी दिला.
शहरातील गर्भवती नियमित तपासणीसाठी प्राथमिक आरोग्य केंद्रात गेली होती. येथे रक्त तपाणीसाठी तिच्यासह अन्य महिलांचे नमुने घेतले. संबंधित महिलेचा तपासणी अहवाल २२ ऑगस्टला आला. यावेळी समुपदेशक महिलेने खातरजमा न करता तुम्ही एचआयव्ही पॉझिटिव्ह असल्याचे सांगितले व तुझ्या कुटुंबाची रक्ततपासणी केली पाहिजे, असे सांगितले. यामुळे गर्भवती महिलेची मानसिकता ढासळल्याने ती आजारी पडली. तिचा पतीही या विचाराने आत्महत्या करण्याच्या मार्गावर होता. दरम्यान नातेवाईकांच्या सल्ल्याने त्यांनी खासगी रुग्णालयात तपासणी केली असता एचआयव्ही नसल्याचा अहवाल मिळाला. त्यानंतर पुन्हा आयजीएम रुग्णालयात तपासणी केल्यावर एचआयव्ही नसल्याचे समजले. समुपदेशक महिलेच्या बेजबाबदारपणाने संपूर्ण कुटुंब उद्‌ध्वस्त होण्याच्या मार्गावर होते. त्यामुळे संबंधित समुपदेशक महिलेवर कारवाई करावी, असे निवेदनात नमूद केले आहे. यावेळी सतीश भस्मे, विद्या सुतार, आण्णा आवळे, संभाजी शिंगारे, मनोज कांबळे, दानंजय दाहोत्रे, शाहनवाज मुजावर संदीप गवड, पंकज तिप्पे, जुनेद मोमीन, महादेव सातपुते उपस्थित होते.
-----------------
कोट :
संबधित समुपदेशकतेच्या बदलीचा प्रस्ताव वरिष्ठ कार्यालयाकडे पाठविला आहे.
- डॉ. नंदकुमार बनगे, वैद्यकीय अधीक्षक, आयजीएम