पर्युषण पर्व व्याख्यानमाला

लोगो : पर्युषण पर्व व्याख्यानमाला

धर्मपालन ही काळाची गरज : चेतन पाटील
सकाळ वृत्तसेवा
कोल्हापूर, ता. ३ : जैन धर्म अतिप्राचीन आहे. या धर्माची तत्त्‍वे जगभर अंगीकारली जात असून, धर्म पालन करणे ही काळाची गरज असल्याचे स्पष्ट मत चेतन पाटील (जैनापूर) यांनी व्यक्त केले. दिगंबर जैन बोर्डिंगतर्फे करवीररत्न दिवाण बहाद्दूर अण्णासाहेब लठ्ठे पर्युषण पर्व व्याख्यानमालेचे दुसरे पुष्प गुंफताना ते बोलत होते. कोल्हापूर इलेक्ट्रिक गुडस असोसिएशनचे अध्यक्ष अजित कोठारी अध्यक्षस्थानी होते.
‘धर्म खरंच आवश्यक आहे’ या विषयावर संवाद साधताना पाटील म्हणाले, ‘प्रत्येक धर्माने माणुसकी आणि त्याचबरोबर आई-वडिलांच्या सन्मानाचीच शिकवण दिली आहे. ही शिकवण सर्वांनी अंगीकारली पाहिजे. त्याशिवाय पुढील पिढीतही ती रुजवायला हवी.’
संजय शेटे, अतुल होनोले, आर. जे. पाटील, पापा चमकले, एस. बी. पाटील उपस्थित होते. वर्धमान मगदूम यांनी स्वागत व प्रास्ताविक केले. बोर्डिंगचे अध्यक्ष सुरेश रोटे, सचिव विजयकुमार शेट्टी यांच्या हस्ते पाहुण्यांचे स्वागत झाले. प्रज्योत पाटील यांनी सूत्रसंचालन केले. पार्श्व चौगुले यांनी आभार मानले.
दरम्यान, आरती होनोले यांच्या ‘दशधर्मातून मानवधर्माकडे’ या विषयावरील व्याख्यानाने उद्या (बुधवारी) व्याख्यानमालेची सांगता होईल.