गंगावेश, शाहूपुरी कुंभार गल्लीमध्ये वाहनांना प्रवेश बंद

गंगावेस, शाहूपुरी कुंभार गल्लीत
उद्या वाहनांना प्रवेश बंद
आयर्विन ख्रिश्‍चन मैदानावर पार्किंग सुविधा
सकाळ वृत्तसेवा
कोल्हापूर, ता. ५ ः सार्वजनिक व घरगुती गणेशमूर्ती आगमनासाठी शनिवारी (ता. ७) गंगावेस, शाहूपुरी, बापट कॅम्प परिसरात होणारी गर्दी लक्षात घेऊन कुंभार गल्लीमध्ये वाहनांना प्रवेश बंदी करण्यात आली आहे. शाहूपुरी कुंभार गल्लीतून हाोणारी वाहतूक फोर्ड कॉर्नर, उमा टॉकीजमार्गे वळविण्यात येणार आहे. शाहू उद्यान गंगावेस ते बजापराव माजगावकर तालीम मार्गही वाहतुकीस बंद राहणार आहे.
पापाची तिकटी येथून बुरुड गल्लीकडे जाणारी वाहने महानगरपालिकामार्गे जातील. तसेच गंगावेस ते माळकर तिकटी मार्गावर वाहने उभी करण्यास मनाई करण्यात आली आहे. बापट कँपमध्ये जाणाऱ्या वाहनांची संख्या लक्षात घेऊन केवळ गणेशमूर्ती आणण्यासाठी जाणाऱ्या वाहनांनाच शिरोली टोल नाक्यापासून पुढे सोडले जाणार आहे.
---------------
चौकट
पार्किंग व्यवस्था...
शाहूपुरीत येणाऱ्या भाविकांनी आपली वाहने आयर्विन ख्रिश्‍चन हायस्कूल मैदान, शाहूपुरी चौथी व पाचवी गल्ली याठिकाणी पार्क करावीत, तर बापट कँपमध्ये येणाऱ्या भाविकांसाठी प्रिन्स शिवाजी विद्यामंदिर, जाधववाडी, ओम कॉम्प्लेक्ससमोरील रिकामी जागा याठिकाणी पार्किंगची सुविधा असणार आहे. शनिवारी सकाळी ७ वाजलेपासून गणेशमूर्ती आगमन मिरवणुका सुरू असेपर्यंत हा आदेश लागू असल्याचे पोलिस निरीक्षक अनिल तनपुरे यांनी पत्रकाद्वारे कळविले आहे.