आमदार सतेज पाटील

विधानसभा निवडणुकीत महायुतीची
एक्झिट होणारच ः सतेज पाटील

कोल्हापूर, ता. ३ : बदलापूरच्या घटनेत अजूनही काही दोषींवर कारवाई केलेली नाही. मालवणमध्ये छत्रपती शिवाजी महाराज यांचा अनादर झाला. स्पर्धा परीक्षा देणाऱ्या विद्यार्थ्यांमध्ये नाराजी आहे. महागाईचा सर्वसामान्य नागरिकांना प्रचंड त्रास सहन करावा लागत आहे. त्यामुळे महायुतीकडून जनतेचा भ्रमनिरास झाला असल्याने महाराष्ट्रात महायुतीची एक्‍झिट ठरलेली आहे, असा दावा आमदार सतेज पाटील यांनी केला.
चुकीची वक्तव्ये करून पोलिसांचे आत्मबळ कमी करण्याचे काम सत्ताधाऱ्यांकडून होत आहे, हे दुर्दैवी असल्याचेही ते म्हणाले. लोकसभेचे विरोधी पक्ष नेते आणि काँग्रेस नेते राहुल गांधी उद्या (ता. ४) कोल्हापूर दौऱ्यावर येत आहेत. या पार्श्वभूमीवर त्यांनी माध्यमांशी संवाद साधला.
आमदार पाटील म्हणाले, ‘पोलिसांबाबत चुकीची वक्तव्ये केली जात आहेत. सत्ताधारी पक्षातूनच पोलिसांना बोलले जात आहे. पोलिसांचे आत्मबळ कमी करण्याचे काम सत्ताधाऱ्यांकडून होत आहे. चुकीचे बोलणाऱ्यांना सत्ताधाऱ्यांकडून पाठीशी घालण्याचे काम केले जात आहे. पोलिसांवर इतर पक्षाच्या कोणी तरी टीका केली, तर त्यांच्यावर पोलिसांनी स्वत:हून गुन्हे दाखल केले असते. या ठिकाणी मात्र पोलिसांवरही कारवाई करू नका म्हणून दबाव टाकला जात आहे. समाजात तेढ निर्माण करून निवडणुकीसाठी काही मिळेल का, हे पाहिले जात आहे. गृहमंत्री ज्या पक्षाचे आहेत, ते कोणत्याही सूचना देत नाहीत.’