वायू गळती

जिंदल पोर्टमधील वायू गळतीतील
बाधित १७ मुले पुन्हा रुग्णालयात

रत्नागिरी, ता. १६ : जिंदल पोर्ट कंपनीच्या परिसरात असलेल्या वायू गळतीमुळे जयगड माध्यमिक विद्यामंदिर येथील ७० विद्यार्थी बाधित झाले. त्यांच्यावर जिल्हा शासकीय रुग्णालयात उपचार करून सोडून देण्यात आले; परंतु त्यापैकी १७ विद्यार्थ्यांना त्रास होऊ लागल्यामुळे पुन्हा रत्नागिरीतील परकार हॉस्पिटलमध्ये दाखल करण्यात आले आहे. या मुलांना पोटदुखी, श्वसनाचा, डोकेदुखीचा त्रास होऊ लागला आहे. मुलांना कोणताही धोका नाही; परंतु त्यांच्या लक्षणाप्रमाणे त्यांच्यावर उपचार सुरू आहेत, अशी माहिती परकार हॉस्पिटलचे मुख्य डॉ. अमित पंडोले यांनी दिली.
जिंदल पोर्टच्या गॅस टॅंकर पार्किंग प्लांटमध्ये गॅस गळतीचा हा प्रकार घडला होता. एलपीजी गॅस गळती झाली तर त्याला वास येण्यासाठी त्यामध्ये इथाईल मरकॅप्टन हा वायू मिसळला जातो. या प्लांटवर वायू मिसळताना त्याची गळती होऊन जवळपास असलेल्या जयगड माध्यमिक विद्यामंदिरमधील सुमारे ७० मुलांना त्याची बाधा झाली. उपचार केल्यानंतर ५८ मुलांना घरी सोडण्यात आले, तर १२ मुले उपचार घेत आहेत.
दरम्यान, उपचार घेऊन गेलेल्या मुलांपैकी काल आणि आज दिवसभरात १७ मुले पुन्हा परकार हॉस्पिटलमध्ये दाखल झाली आहेत. या मुलांना पुन्हा श्वसनाचा, पोटदुखी, डोकेदुखीचा त्रास सुरू झाला आहे. या मुलांच्या सर्व चाचण्या करण्यात आल्या. त्यांचे अहवाल चांगले आहेत; परंतु त्यांना होणाऱ्या त्रासाप्रमाणे त्यांच्यावर उपचार सुरू आहेत, असे डॉ. पंडोले यांनी सांगितले.