कुशिरे-निगवे उड्डाण पुलासाठी रविवारी आंदोलन

नागपूर-रत्नागिरी महामार्गावर
कुशिरे-निगवे उड्डाणपूल करा

कृती समितीचे उद्या ठिय्या आंदोलन

सकाळ वृत्तसेवा

कोल्हापूर, ता. ३ ः नियोजित नागपूर- रत्नागिरी महामार्ग क्रमांक १६६ वर कुशिरे (ता. पन्हाळा) व निगवे दुमाला (ता. करवीर) या दरम्यान उड्डाण बांधावा, या मागणीसाठी निगवे-कुशिरे उड्डाणपूल कृती समितीच्यावतीने रविवारी (ता. ५) कुशिरे महामार्ग कामाच्या ठिकाणी राष्ट्रीय महामार्ग प्राधिकरण व संबंधित ठेकेदार कंपनीविरोधात निदर्शने व ठिय्या आंदोलन केले जाणार आहे. अशी माहिती कुशिरेचे सरपंच बाबासाहेब माने यांनी पत्रकार परिषदेत दिली.
नियोजित नागपूर- रत्नागिरी महामार्गावर कुशिरे व निगवे दुमाला या गावच्या हद्दीत उड्डाण पुलाचे नियोजन नाही. त्यामुळे वाहतुकीला धोका निर्माण झाला आहे. या मागणीचे निवेदन निगवे दुमाला, कुशिरे, पोहाळे, जोतिबा, गिरोली, सादळे, मादळे, जाखले, केखले, पोखले, भैरेवाडी, केर्ली भागातील सरपंच व लोकप्रतिनिधींनी खासदार धैर्यशील माने, आमदार विनय कोरे व रस्ते विकास महामंडळाच्या अधिकाऱ्यांना देण्यात आले आहे. परंतु कुशिरे येथील महामार्गावर जलदगतीने काम सुरू आहे. परंतू उड्डाणपूल अगर बॉक्सब्रिजचे कोणतेही नियोजन नाही. त्यामुळे लोकांमध्ये प्रचंड संताप व्यक्त होत आहे. याच रस्त्यावरून जोतिबा डोंगरावर जाणाऱ्या भाविकांच्या वाहनांची संख्या लक्षणीय असते. त्यांच्या जीवाला धोका निर्माण होऊ शकतो. त्यामुळे हे आंदोलन रविवारी केले जाणार आहे. पत्रकार परिषदेस उपसरपंच विष्णू कळके, पोहाळे सरपंच सुरेखा मोरे, गिरोली सरपंच छाया गुरव, दादासाहेब तावडे, सुरेश बेनाडे, आनंदा राजहंस, केदार बोरचाटे, संतोष साबळे, माजी उपसरपंच सुरज एकशिंगे, सुनील नवाळे उपस्थित होते.