इचल : मक्तेदार कंपनीला नोटीस

कचरा उठाव करा, अन्यथा ठेका रद्द
ढिलाईबद्दल ठेकेदार कंपनीस इचलकरंजी महापालिकेची नोटीस

इचलकरंजी, ता. १७ ः शहरातील कचरा उठाव करण्याच्या कामात ढिलाई झाल्याने ठेकेदार कंपनीस आज महापालिकेचे आरोग्य अधिकारी डॉ. सुनीलदत्त संगेवार यांनी नोटीस दिली. यात कचऱ्याचा तातडीने उठाव न केल्यास ठेका रद्द करण्याचा इशारा दिला आहे. दरम्यान, दोन दिवसांत शहरातील सर्व कचऱ्याचा उठाव करण्यात येईल, अशी हमी ठेकेदार कंपनीने दिल्याची माहिती महापालिका प्रशासनाकडून देण्यात आली आहे.
शहरात कचरा उठावात ढिलाई होत असल्याबाबत आज ‘सकाळ’मध्ये वृत्त प्रसिद्ध झाले होते. यामध्ये सर्वत्र कचऱ्याचे ढीग पडले असून आजार पसरण्याचा धोका असल्याचे नमूद केले होते. त्याची गंभीर दखल महापालिकेच्या आरोग्य विभागाने घेतली आहे. आरोग्य अधिकारी डॉ. संगेवार यांनी आज ठेकेदार कंपनी असलेल्या एनडीके एलएलपी या फलटणच्या कंपनीस नोटीस दिली आहे. यामध्ये शहरात सर्वत्र कचऱ्याचे ढिग दिसत आहेत. त्यामुळे हा कचरा तातडीने न उचलल्यास आपला ठेका रद्द करण्यात येईल, असा इशारा दिला आहे. त्यानंतर या कंपनीकडून दोन दिवसांत नियोजन करून सर्व कचऱ्याचा उठाव करण्याची हमी दिली आहे.
-----
चौकट
दोन महिन्यांपासून
विस्कळीतपणा
फलटणच्या संबंधित ठेकेदार कंपनीला दोन वर्षांच्या मुदतीने कचरा संकलन, उठाव व वाहतूक करण्याचे काम दिले आहे. सुरुवातीला या कंपनीचे काम चांगल्या पद्धतीने सुरू होते; मात्र दोन महिन्यांपासून कामात विस्कळीतपणा आला असल्याचे दिसून येत असल्याची माहिती महापालिका प्रशासनाकडून देण्यात आली. त्यामुळे कामात योग्य सुधारणा न झाल्यास या कंपनीचा ठेका रद्द होण्याची शक्यता आहे. त्या दृष्टीने प्रशासनाकडून पूर्वतयारी सुरू केल्याची माहिती समोर आली आहे.