माकप आंदोलन

३५७७६

खरातच्या संपर्कातील
आमदारांचा राजीनामा घ्या

माकपतर्फे निदर्शनावेळी मागणी

सकाळ वृत्तसेवा

कोल्हापूर, ता. ६ ः नाशिक येथील वादग्रस्त ठरलेल्या शंकर खरात यांच्या संपर्कात राहिलेल्या २९ आमदारांचा राजीनामा घ्यावा; या मागणीसाठी मार्क्सवादी कम्युनिस्ट पक्षातर्फे आज येथील शिवाजी चौकात जोरदार निदर्शने करण्यात आली.
मार्क्सवादी पक्षाचे जिल्हाध्यक्ष चंद्रकांत यादव म्हणाले की, ‘‘नाशिक येथे मांत्रिक असल्याचे भासवून महिलांवर अत्याचार केल्याचा आरोप शंकर खरात याला पोलिसांनी अटक केली आहे. अनेक महिलांचे शोषण केल्याचे प्रकरण पुढे येत आहे. राज्य महिला आयोगाच्या तत्कालीन अध्यक्षा रूपाली चाकणकर खरात यांच्या संपर्कात होत्या; अशी माहिती पुढे आली आहे. जसा तपास पुढे गेला तसा राज्यातील २९ आमदार कमी अधिक प्रमाणात खरात याच्या संपर्कात होते. अशी माहिती पुढे आली आहे. खरात यांच्यावर महिलांवर अत्याचार केल्याचे गंभीर आरोप आहेत.’’ खरात याच्या संपर्कात असलेल्या आमदारांकडून त्याला अभय होते का; अशी शंका आहे. भविष्यातही खरातला वाचविण्यासाठी प्रयत्न होऊ शकतील, याचा विचार करून आमदारांचे राजीनामे घ्यावेत; अशी मागणी मार्क्सवादी कम्युनिस्ट पक्षातर्फे करण्यात येत आहे. असेही श्री. यादव यांनी सांगितले.
शिवाजी मगदूम, शंकर कराळे, विवेकानंद गोडसे, राजेश वरक, आप्पासाहेब परिट, जयवंत शिंदे उपस्थित होते. खरात याच्या संपर्कात असलेल्या आमदारांचे राजीनामे घेण्याच्या मागणीसाठी मार्क्सवादी कम्युनिस्ट पक्षाने राज्यभर आंदोलन केले आहे. त्याचाच भाग म्हणून कोल्हापुरातही आंदोलन केले आहे; असेही यादव यांनी सांगितले.