रंकाळा तलाव- हिंदू युवा प्रतिष्ठान प्रसिध्दीपत्रक

रंकाळा तलाव कायमचा
मुजवायचा आहे का?
हिंदू युवा प्रतिष्ठानचे प्रसिध्दीपत्रक
कोल्हापूर, ता. २८ ः ऐतिहासिक रंकाळा तलाव अस्तित्व हळूहळू गमावत असून, महापालिका प्रशासनाच्या हलगर्जीपणामुळे तलावात सांडपाणी मिसळत आहे. वारंवार तलावातील मासे व इतर जलचर मृत झाल्याचे प्रकार घडत आहेत. महापालिकेला हा तलाव कायमचा मुजवायचा आहे का?, असा आरोप हिंदू युवा प्रतिष्ठानचे अशोक देसाई आणि रंकाळाप्रेमींनी पत्रकातून केला आहे, तसे प्रसिध्दीस दिले आहे.
तलावाच्या पुनरुज्जीवनासाठी महापालिकेने ठोस उपायोजना करणे गरजेचे आहे. मात्र, प्रत्येक वेळी वेगळ्याच तंत्रज्ञानाची चर्चा होते आणि मूळ दुखणे बाजूलाच राहते. यापूर्वी अशा अनेक संकल्पना कुचकामी ठरल्या आहेत. २०२३ मध्ये अमृत योजनेच्या टप्पा दोनअंतर्गत सुमारे ११ कोटी ९९ लाखांचा आराखडा केला. महाराष्ट्र जीवन प्राधिकरणाकडून हा आराखडा मंजूरही होऊन आला होता. त्याचे पुढे काय झाले?, हे गुलदस्त्यात आहे. श्याम सोसायटीच्या नाल्यातून १२ ते १४ लाख लिटर, देशमुख हॉल नाल्यातून चार ते पाच लाख लिटर, सरनाईक कॉलनी नाल्यातून सहा ते सात लाख लिटर व परताळ्याच्या नाल्यातून पाच ते सहा लाख लिटर सांडपाणी मिसळत असतानाही प्रशासन गप्पच असल्याचे पत्रकात म्हटले आहे.