ओलम कारखान्याकडून ऊस बिले जमा ः भरत कुंडल

02022
ओलम कारखान्याकडून
ऊस बिले जमा : भरत कुंडल
सकाळ वृत्तसेवा
कोवाड, ता. २९ : राजगोळी खुर्द (ता. चंदगड) येथील ओलम (हेमरस) साखर कारखान्याने चालू गळीत हंगामातील ऊस बिले प्रतिटन ३१४४ दराप्रमाणे ऊस उत्पादकांच्या बँक खात्यावर जमा केली आहेत. नवीन दरानुसार तोडणी व वाहतुकीची बिले, कमिशन, डिपॉझिट बिले वाहतुकदारांच्या बँक खात्यावर जमा केल्याची माहिती कारखान्याचे बिझनेस हेड भरत कुंडल यांनी दिली.
ओलम साखर कारखान्याने जिल्ह्यात सर्वांत प्रथम गळीत हंगामातील सर्व ऊस बिले व वाहतूकदारांची बिले अदा करून शेतकऱ्यांचा विश्वास संपादन केला आहे. सध्या लग्नसराई, यात्रा, जत्रा सुरू असल्याने व खत खरेदीसाठी लोकांना पैशांची गरज भासते. त्यामुळे कारखाना प्रशासनाने गळीत हंगामाची सांगता होताच तत्काळ शेतकऱ्यांची बिले अदा करून शेतकऱ्यांना दिलेला शब्द पाळल्याचे कुंडल यांनी सांगितले. चालू गळीत हंगामात ५५०च्या वर तोडणी व वाहतूक यंत्रणा कार्यान्वित होती. त्यामुळे ६ लाख ४१ हजार १११ टन उसाचे गाळप झाले. शेतकरी, कामगार व तोडणी मजूर व वाहतूकदारांच्या प्रयत्नामुळे कारखान्याचे ऊस गाळपाचे निर्धारित उद्दिष्ट पूर्ण झाले. पुढील गळीत हंगामासाठी ऊस नोंद व वाहतूक करार करून घेण्याचे काम सुरू झाले आहे. कारखान्याच्या चंदगड, आजरा, गडहिंग्लज व सीमा भागातील शेती कार्यालयातून ऊस नोंदीचे काम सुरू आहे. ३ मेपासून वाहतूक करार केले जाणार असल्याने वाहतूकदारांनी जवळच्या शेती कार्यालयाशी संपर्क साधावा, असे आवाहन कुंडल यांनी केले आहे.