आत्मा अंतर्गत खरीप हंगामच्या शेतीशाळेस महिलांचा प्रतिसाद

01022

आत्माअंतर्गत खरीप हंगामाच्या
शेतीशाळेस महिलांचा प्रतिसाद

कसबा बावडा, ता. ९ : कृषी विभाग व कृषी तंत्रज्ञान व्यवस्थापन यंत्रणा (आत्मा) अंतर्गत खरीप हंगामच्या सोयाबीन पीक व्यवस्थापन विषयावर हलसवडे येथील महिलांसाठी शेतीशाळा सुरू झाली. शेतीशाळेचे उद्घाटन ‘आत्मा’च्या प्रकल्प संचालिका रक्षा शिंदे यांच्याहस्ते झाले. यावेळी शेतकरी महिला उपस्थित होत्या.
प्रकल्प संचालिका शिंदे यांनी महिलांना सोयाबीन पिकाबाबत मार्गदर्शन केले. शेतीशाळेचा मुख्य उद्देश आणि त्यातून आर्थिक विकास याविषयी संवाद साधला. सोयाबीन पिकाच्या पेरणीपासून काढणीपर्यंतच्या व्यवस्थापनाची माहिती दिली. यावेळी एकरी एक हजार रुपये अनुदान तत्त्वावर सोयाबीन बियाण्याचे वाटप करणार असल्याचे त्यांनी जाहीर केले. शेतकऱ्यांनी लाभ घ्यावा, असे आवाहन केले.
यामध्ये सांगवडे, सांगवडेवाडी, हलसवडे, चिंचवाड, वळिवडे, वसगडे, उचगाव, सरनोबतवाडी, मुडशिंगी आदी गावांचा समावेश होता. बियाणे उगवण क्षमता, तपासणी व बीज प्रक्रियेचे प्रात्यक्षिके दाखविली. माती परीक्षणाबाबत प्रदीप रोकडे यांनी मार्गदर्शन केले. सुंदरम माने यांनी महिला शेतकरी गट स्थापन करण्याचे फायदे सांगितले. नवीन गटाची निर्मिती कशी करावी याची माहिती सांगितली. गटाला नवीन दिशा देऊन व्यवसाय उभा करण्याचे आवाहन केले. लग्न विभागाच्या माध्यमातून महिलांना कुक्कुटपालन व पीएमएफएमइ योजनेअंतर्गत व्यवसाय निर्मितीबाबतचे मार्गदर्शन केले.
कार्यक्रमाचे नियोजन आणि मार्गदर्शन निखिल कुलकर्णी, राहुल पाटील, बसवराज बिराजदार, अरुण भिंगारदिवे, बंडा कुंभार, मोहिनी वाळेकर यांनी केले. कार्यक्रमास सोनम कांबळे, सीमा कांबळे, संगीता कांबळे, मंगल कांबळे आदी महिला शेतकरी उपस्थित होत्या. गीता कांबळे यांनी सूत्रसंचालन केले.