प्रज्ञाशोध परिक्षेतील यशस्वी विद्यार्थ्यांना मिळणार रोख पारितोषिक : एक लाख ४८ हजार रुपये वर्ग : मराठी माध्यमातील २२५ विद्यार्थ्यांना लाभ

प्रज्ञाशोध परिक्षेतील यशस्वी
विद्यार्थ्यांना रोख पारितोषिक

एक लाख ४८ हजार रुपये वर्ग; मराठी माध्यमातील २२५ विद्यार्थ्यांना लाभ

म्हाकवे, ता. ३० : कोल्हापूर जिल्हा परिषदेने २०२२-२३ मध्ये नाविन्यपूर्ण योजनेअंतर्गत चौथी व सातवीच्या विद्यार्थ्यांसाठी प्रज्ञाशोध परीक्षा घेतली होती. उर्दू व मराठी माध्यमातील मुलांसाठी घेतलेल्या या परीक्षेत यशस्वी झालेल्या विद्यार्थ्यांना रोख पारितोषिक देण्यासाठी एक लाख ४८ हजार रुपयांची रक्कम जिल्हा परिषदेच्या शिक्षणाधिकाऱ्यांनी पंचायत समितीच्या गटशिक्षणाधिकारी यांच्याकडे वर्ग केली आहे. यामध्ये मराठी माध्यमातील २२५ विद्यार्थ्यांना शिष्यवृत्ती मिळणार आहे.
इयत्ता चौथी व सातवीसाठी ही प्रज्ञाशोध परीक्षा घेण्यात आली होती. जिल्हास्तरावर मराठी माध्यमातील चौथीच्या ११३ विद्यार्थ्यांना तर सातवीच्या ११२ विद्यार्थ्यांची निवड रोख पारितोषिकसाठी करण्यात आली आहे. तालुकानिहाय चौथी व सातवी पारितोषिक रक्कम व कंसात विद्यार्थी संख्या (मराठी) अशी कागल- १२,५०० रु. (४६), गगनबावडा-६०० रु. (१), भुदरगड -१०,००० रु. (२९), चंदगड-१३,००० रु. (२३), गडहिंग्लज -७००० रु. (३), हातकणंगले -१४,००० रु. (५), आजरा १२,५०० रु. (९), करवीर- ६००० रु. (२७), पन्हाळा-८००० रु. (१०), राधानगरी- १५,००० रु. (४३), शाहूवाडी-८००० रु. (१३), शिरोळ-१८,५०० रु. (१६).---