साकेतील जनावरांच्या मृत्यूची वरिष्ठ पातळीवर चौकशी मृत्यू विषबाधा होऊन की अन्य कारणाने

साकेतील जनावरांच्या मृत्यूची
वरिष्ठ पातळीवरून चौकशी

म्हाकवे, ता.१८: साके (ता.कागल) येथील तानाजी सातापा गवसे यांच्या चार गाईंचा मृत्यू विषबाधेने झाला आहे की अन्य कारणाने याबाबत परिसरात चर्चा आहे. या गायींचा मृत्यू कशाने आणि कधी झाला, याची सखोल चौकशी वरिष्ठ पातळीवरून पशुवैद्यकीय अधिकाऱ्यांमार्फत केली जात आहे. या घटनेनंतर शासकीय पातळीवर खळबळ उडाली असून, घटनेची वरिष्ठ अधिकाऱ्यांना दखल आहे. गायींचा मृत्यू विषबाधा होऊन की अन्य कारणाने झाला आहे, हे पशुवैद्यकीय अधिकारी यांच्या चौकशी अहवालातून स्पष्ट होईल.
गवसे यांचा व्हन्नाळी साके रस्त्यावर पिण्याच्या आडाजवळ गोठा आहे. अज्ञाताने गवसे यांच्या शेतातील वैरणीवर विषारी औषध फवारणी केली. ही वैरण त्यांनी कापून गायींना घातल्यामुळे या गायींचा मृत्यू झाला आहे, अशी चर्चा आहे. अज्ञातांनी केलेल्या विषबाधेने जनावरांचा मृत्यू झाला असेल तर या घटनेची सखोल चौकशी होणे गरजेचे आहे. महत्त्वाची म्हणजे या गायींचा मृत्यू अन्य कारणांनी झाला आहे का, याचाही सखोल चौकशी शासकीय पातळीवरून सुरू आहे. गोठ्यातील अन्य गायी व लहान वासरू यांना विषबाधा झालेली नाही. घटनेचे गांभीर्य ओळखून पशुवैद्यकीय अधिकाऱ्यांनी तत्काळ बैठक घेतली, परंतु या घटनेची नोंद पोलिसांत झालेली नाही. याचे कारणही गुलदस्त्यातच आहे.