मलकापूरातील विकास कामांसाठी ३ कोटी ५० लाख रुपये मंजूर

मलकापूरला विविध कामांसाठी
साडेतीन कोटींचा निधी मंजूर
मलकापूर, ता. २९ ः येथे वाचनालय व बहुउद्देशीय सभागृह बांधणे, महादेव टेकडीवर बगीचा करणे, व्यायामशाळा बांधणे, जलशुध्दीकरण योजनेंतर्गत कामे करणे यासह विविध विकासकामांसाठी आमदार डॉ. विनय कोरे यांच्या प्रयत्नातून वैशिष्टयपूर्ण योजनेतून ३ कोटी ५० लाख रुपयांचा निधी मंजूर झाला. याबाबतची माहिती माजी नगराध्यक्ष अमोल केसरकर यांनी दिली.
ते म्हणाले, ‘‘आमदार विनय कोरे यांनी मुख्यमंत्री एथनाथ शिंदे यांच्याशी पत्रव्यवहार करून विकासकामांना निधी मिळण्यासाठी पाठपुरावा केला. त्यानुसार नगरविकास खात्याकडून विशेष अनुदान योजनेतून साडेतीन कोटींचा निधी मंजूर झाला. त्याबाबत नगरविकास खात्याकडून लेखी आदेशही मिळाला आहे.
मंजूर कामे अशी कंसात निधी; महादेव टेकडीवर बगीचा करणे (१ कोटी ३१ लाख), जलशुध्दीकरण योजनेंतर्गतची कामे करणे (७० लाख), वाचनालय व बहूउद्देशीय सभागृह बांधणे (५४ लाख), महादेव तरुण मंडळ येथे सामाजिक सभागृह व व्यायामशाळा बांधणे (२५ लाख), पाण्याच्या टाकीजवळ सामाजिक सभागृह व व्यायामशाळा बांधणे (२५ लाख), महादेव टेकडीवर काँक्रिट रस्ता करणे (२५ लाख), शाळी नदीघाट दुरुस्ती करणे (१० लाख), मुख्य चौकातील शिवतीर्थ परिसर विकसित करणे (१० लाख). या कामांसाठी निधी मंजूर व्हावा यासह कागदपत्रांचा पाठपुरावा करण्यासाठी जिल्हा परिषदेचे माजी सभापती सर्जेराव पाटील, माजी उपनगराध्यक्ष दिलीप पाटील यांचेही विशेष सहकार्य झाल्याचे केसरकर यांनी सांगितले.