''खाजगी सावकारी'' ने घेतला तरुणाचा बळी.

यमगे येथील तरुणाच्या
आत्महत्येप्रकरणी दोघांवर गुन्हा

मुरगूड, ता.१८: यमगे (ता.कागल) येथील रोहित बाळासो पाटील (वय ३०) या तरुणाच्या आत्महत्येप्रकरणी मुरगूड पोलिसांत दोघांवर गुन्हा दाखल झाला आहे.
याबाबत पोलिसांकडून मिळालेली माहिती अशी, मुरगूडमधील प्रविण पांडूरंग भारमल याच्याकडून यमगे येथील सदाशिव आण्णासो महाजन याने ७० हजार रुपये कर्ज घेतले होते. या प्रकरणात यमगेतीलच रोहित पाटील याने कर्ज मिळवून देण्यासाठी मध्यस्थी केली होती. मात्र सदाशिव महाजन याने कर्जाची रक्कम वेळेत परत केली नाही. त्यामुळे कर्ज देणाऱ्या प्रविण भारमलने मध्यस्थ रोहितच्या मागे तगादा लावला होता. दोन दिवसांत रक्कम नाही दिली तर जनावरे सोडून नेणार अशी धमकीही दिली होती. त्यामुळे रोहितने २८ जुलै रोजी त्याच्या मोबाईलच्या व्हॉटसअपवर सदाशिव महाजन व प्रविण भारमल या दोघांनी ४ लाख ६० हजार रुपये दे असा तगादा लावल्यामुळे आपण आत्महत्या करीत असल्याचे स्टेट्स ठेवून शेतातील झाडाला दोरीने गळफास घेऊन आत्महत्या केली. तशी फिर्याद रोहितचे वडील बाळासो पाटील यांनी मुरगूड पोलिसांत दिली आहे.
दरम्यान,फिर्यादीनुसार प्रवीण भारमल आणि सदाशिव महाजन यांच्यावर गुन्हा दाखल करण्यात आला आहे. अधिक तपास पोलिस निरीक्षक गजानन सरगरे यांच्या मार्गदर्शनाखाली पोलिस उपनिरीक्षक वाघमारे करीत आहेत.