मुरगूडमधील स्मशानशेड परिसराची स्वच्छता करा

मुरगूडमधील स्मशानशेड
परिसराची स्वच्छता करा

मुरगूड, ता. ५ : देवगड-निपाणी राज्य मार्गावरील स्मशानशेडभोवती झाडेझुडपे आणि गवतांचे प्रमाण प्रचंड वाढल्यामुळे अडचणीचे ठरत आहे. हा परिसर स्वच्छ करण्यात यावा, अशी मागणी नागरीकांनी मुरगूड नगरपालिका प्रशासनाकडे केली आहे.
पुरामुळे गावभागातील स्मशानभूमी पाण्याखाली गेली तर लोक या स्मशानभूमीचा वापर करतात. मात्र, येथे झाडेझुडपे वाढल्यामुळे या स्मशानभूमीकडे जाणे अडचणीचे ठरत आहे. काही दिवसापूर्वी स्मशानभूमी दुरुस्ती करावी, यासाठी निवेदन दिले होते. त्यानंतर स्मशानभूमीची डागडुजी करून या ठिकाण असलेला नगरपालिकेचा कचरा हटवून प्रशासनाने तेथील स्वच्छता करून बैठक व्यवस्था केली होती. मात्र, त्याकडे पुन्हा दुर्लक्ष झाल्यामुळे तेथील बाकड्यांची मोडतोड झाली आहे. तसेच सभोवती गवताचे आणि झाडाझुडपांचे साम्राज्य वाढले आहे. त्यामुळे अंत्यसंस्कार करायचे कसे? असा प्रश्न उपस्थित होत आहे. त्यामुळे हा परिसर स्वच्छ करावा, अशी मागणी नागरिकांनी पालिका प्रशासनाकडे केली.
मागणीचे निवेदन सर्जेराव भाट, ओंकार पोतदार, सोमनाथ यरनाळकर, हृषीकेश भारमल, अजित कांबळे, सूरज खंडागळे, तानाजी भराडे, संकेत भोसले यांनी दिले. दरम्यान यावेळी मुख्याधिकारी संदीप घार्गे यांनी आरोग्य विभागास योग्य त्या सूचना देऊन स्मशानशेड परिसरात वाढलेले गवत, झाडेझुडपे काढण्याच्या सूचना दिल्या.
.......