पंधरावा वित्त आयोग आणि जलजीवन योजनेवरुन शियेची ग्रामसभा वादळी

शियेची ग्रामसभा वादळी
पंधरावा वित्त आयोग, जलजीवन योजनेवरून वाद
सकाळ वृत्तसेवा
शिये, ता. १६ : पंधरावा वित्त आयोग आणि जलजीवन योजनेवरून शियेची विशेष ग्रामसभा वादळी ठरली. ग्रामसभेच्या अध्यक्षस्थानी सरपंच शीतल मगदूम या होत्या. छत्रपती राजाराम साखर कारखान्याचे संचालक विलास जाधव व तंटामुक्त समितीचे अध्यक्ष पांडुरंग पाटील हे प्रमुख उपस्थित होते.
पंधराव्या वित्त आयोगाच्या कामात गैरव्यवहार झाल्याने भविष्यातील विकासकामांचा आराखडा तयार करताना ग्रामस्थांना विश्‍वासात घ्यावे व तसा ठराव करण्याची मागणी शेतकरी संघटनेच्या कार्यकर्त्यांनी केली. याला उद्धव ठाकरे शिवसेनेचे जिल्हा उपप्रमुख बाजीराव पाटील यांनी पाठिंबा दर्शवला.
ग्रामविकास अधिकारी नीलेश कुंभार यांनी विषय पत्रिकेवरील विषयांचे वाचन करण्यास सुरुवात केली. त्यांच्या प्रत्येक विषयावर शेतकरी संघटनेचे कार्यकर्ते व ग्रामस्थांकडून प्रश्‍न विचारण्यात आले.
घर फाळ्याच्या विषयावर भाजपचे अक्षय पाटील यांनी अपात्र सदस्याचा थकीत फाळा भरलेला नसताना रजिस्टरला फाळा भरला असल्याची नोंद कशी आणि विशेष म्हणजे संबंधित सदस्याला न्यायालयीन कामासाठी तसा दाखलाही देण्यात आला या घटनेकडे लक्ष वेधले. संबंधित सदस्यावर फौजदारी दाखल करा; अन्यथा सर्व ग्रामस्थांचा थकीत घर फाळा माफ करा, अशी मागणी या वेळी ग्रामस्थांनी केली. शेतकरी संघटनेच्या कार्यकर्त्यांनी पंधराव्या वित्त आयोगातील झालेला भ्रष्टाचारास सर्व ग्रामपंचायत सदस्य जबाबदार असल्याचा आरोप केला. त्यांच्या या आरोपाचे खंडन करत ग्रामपंचायत सदस्य विश्‍वास पाटील व उपसरपंच प्रभाकर काशीद यांनी केला.
जलजीवन मिशन योजनेची कागदपत्रे योग्य रीतीने झाली नसल्याचा आरोप शेतकरी संघटनेने केला. यावर जयसिंग पाटील यांनी सदर योजनेचे प्रोसिडिंग व कागदपत्रे हे रीतसर पद्धतीने झाली असल्याचे सांगितले. तरीही संबंधित योजनेचे कॉन्ट्रॅक्टर, सर्व ग्रामपंचायत सदस्य, विविध पक्ष संघटनांचे पदाधिकारी यांची एकत्रित बैठक घेऊन योजना राबवायची की बंद करायची याचा निर्णय घेऊया असे तंटामुक्त समितीचे अध्यक्ष पांडुरंग पाटील यांनी सांगितले.
या वेळी हनुमान विकास सेवा संस्थेचे अध्यक्ष जयसिंग काशीद, माजी सरपंच रणजित कदम, अॅड. माणिक शिंदे, लक्ष्मण काशीद, उत्तम पाटील, सतीश कुरणे, मच्छिंद्र मगदूम आदी उपस्थित होते.