शिरोली औद्योगिक वसाहतीमधील श्री दत्त फौंडर्स अँड इंजिनिअर कंपनीला आग

B03188
शिरोली : औद्योगिक वसाहतीमधील श्री दत्त फाउंडर्स अॅण्ड इंजिनिअर्स कंपनीला लागलेल्या आगीमुळे उठलेले धुराचे लोट.

शिरोली एमआयडीसीतील
श्री दत्त फौंडर्सला आग

सकाळ वृत्तसेवा
नागाव, ता. २५ : शिरोली औद्योगिक वसाहतीमधील श्री दत्त फौंडर्स अँड इंजिनिअर प्रा. लि. या कंपनीला अचानक आग लागली. आज सायंकाळी पाचच्या सुमारास लागलेल्या या आगीत कंपनीचे तीन मजली कार्यालय जळाले. यामध्ये कंपनीचे लाखो रुपयांचे नुकसान झाले. कोल्हापूर महपालिकेच्या अग्निशमन दलाने ही आग वेळेत आटोक्यात आणली. सुदैवाने जीवितहानी झालेली नाही. कंपनीच्या आवारात असणाऱ्या ट्रान्सफॉर्मरमध्ये अचानक शॉर्टसर्किट होऊन ही आग लागली असल्याचा प्राथमिक अंदाज आहे.
वर्षापूर्वीच कंपनीचे नूतनीकरण पूर्ण झाले आहे. सीआय आणि एसजी कास्टिंग उत्पादनात कार्यरत या कंपनीच्या आफिसजवळ अचानक धुराचे लोट बाहेर पडू लागले. त्यामुळे घाबरलेले कर्मचारी पळत बाहेर आले.
दरम्यान कोल्हापूर महापालिकेचे अग्निशमन दल घटनास्थळी दाखल झाले. पाणीपुरवठा करणारे काही स्थानिक टँकरचालक टँकरसह घटनास्थळी आले. त्यामुळे आग वेळेत आटोक्यात आली. शिरोली एमआयडीसी पोलीस ठाण्यात रात्री उशिरापर्यंत याबाबत कंपनीच्या वतीने कोणतीही फिर्याद देण्यात आलेली नव्हती
दरम्यान, शिरोली औद्योगिक वसाहतीमध्ये औद्योगिक विकास महामंडळाचे स्वतःचे फायर स्टेशन असावे अशी खूप वर्षांपासूनची मागणी आहे. पण, औद्योगिक महामंडळाने उद्योगांनाच फायर सेफ्टीसाठी स्वतःचे फायर स्टेशन विकसित करण्याची अट घातली आहे. आणि महापालिकेच्या अग्निशमन दलास वाहतूक कोंडीचा सामना करत वेळेत पोहचण्यासाठी कसरत करावी लागते.