क्लस्टर स्कूलला आमदार आसगावकरांसह शिक्षक समितीचा विरोध

01711
क्लस्टर स्कूलला शिक्षक समितीचा विरोध

फुलेवाडी, ता. १० : क्लस्टर स्कूल सुरू झाल्यास बहुजन समाजातील मुलं शिक्षण प्रवाहातून बाजूला जातील. त्यामुळे कोणत्याही परिस्थितीत क्लस्टर स्कूल सुरू होता कामा नये. त्याला आमचा विरोध राहील, असा इशारा आमदार जयंत आसगावकर यांनी दिला.
प्राथमिक शिक्षक समितीच्या शिष्टमंडळाने आमदार आसगावकर यांच्या नेतृत्वाखाली जि.प. मुख्य कार्यकारी अधिकारी तथा प्रशासक संजयसिंह चव्हाण यांची भेट घेतली. शिक्षकांच्या प्रश्नांवर चर्चा झाली. चर्चेदरम्यान आमदार आसगावकर यांनी क्लस्टर स्कूलला तीव्र विरोध केला. श्री. चव्‍हाण म्हणाले, ‘लवकरच मुख्याध्यापक प्रमोशन होईल. ज्यांना यापूर्वी शाळा दिली आहे त्यांनाही याच आठवड्यात प्रमोशन आदेश देऊ. जे बारावी सायन्स आहेत, पण सध्या समाजशास्त्र किंवा मराठी विषय शिक्षक आहेत जर त्यांनी बीएससी पूर्ण केली असेल तर आयुक्तांकडून परवानगी घेऊन त्यांना विज्ञान विषय शिक्षक म्हणून नवीन आदेश देऊ, असेही चव्हाण यांनी सांगितले. पगार खाती बदलण्यासाठी तीन महिने अगोदर अर्ज करावा, अशी सूचना शिक्षणाधिकारी मीना शेंडकर यांनी केली. यावेळी समितीचे जिल्हा सरचिटणीस प्रभाकर कमळकर, कृष्णात कारंडे, शिक्षक बँक संचालक सुरेश कोळी, बाजीराव पाटील, सतीश बर्गे, गणपतराव मांडवकर, सुनील कुंभार, बालाजी पांढरे, विनायक मगदूम, दीपक पाटील, युवराज सातोसे उपस्थित होते.