शिरवळ - तांबे चोरणार्‍याचे पितळ उघडे - चार जण ताब्यात

शिरवळ चोरीप्रकरणी
कोल्‍हापुरातून चौघे ताब्यात
शिरवळ, ता. २१ : येथील निसार ट्रान्सफॉर्मर प्रा. लि. कंपनीतील १० लाख ५८ हजार रुपये किमतीचे कॉपर (तांबे) चोरीचा गुन्हा दोन दिवसांत उघड करण्यात शिरवळ पोलिसांना यश आले. चोरीस गेलेला मुद्देमाल जप्त करून या टोळीतील तीन संशयितांसह चोरीचा माल विकत घेणारा एक जण अशा चौघांना शिरवळ पोलिसांनी कोल्हापूरातून ताब्यात घेतले आहे. अविनाश दीपक मछले ऊर्फ कोकाटे (वय २४), स्वप्नील महेश गारुंगे (२३, दोघेही रा. एसएससी बोर्डाजवळ, राजेंद्रनगर), शिवाजी प्रभू तारे (४२, रा. साळुंके कॉलनी, भारतनगर कॉलनी) अशी संशयितांची नावे आहेत. विनायक बाळासो गोसावी (४२, रा. गुटकेश्‍वर कॉलनी, शिंगणापूर) खरेदीदार आहे.शिरवळ (ता. खंडाळा) च्या हद्दीतील निसार ट्रान्सफॉर्मर कंपनीत १२ ऑगस्टला रात्रीच्या वेळी चोरट्यांनी प्रवेश करून तांब्याच्या तारा व पट्ट्या तसेच बॉबीचे बन्डल असे एकूण १० लाख ५८ हजार ४०० रुपये किमतीचे सुमारे एक हजार ५१२ किलोचे तांबे चोरून नेले होते.