तहसील व नगरपरिषद प्रशासनाचा हॉटेल व्हॅली व्ह्यूच्या अतिक्रमणावर हातोडा

03815
पन्हाळ्यात अतिक्रमणावर हातोडा
पन्हाळा ता. २८ : येथील एका हॉटेलने शासकीय मुलकीपड जमिनीत परवानगी न घेता केलेल्या जमिनीमधील अतिक्रमणाची गांभिर्याने दखल घेऊन तहसील व नगरपरिषदेने संयुक्तपणे मोहीम राबवत झालेल्या अतिक्रमणावर हातोडा चालवून जमीन ताब्यात घेतली.
पन्हाळ्यातील सि.स.नं.६५२ या सरकारी मुलकीपड जमिनीत अतिक्रमण केले होते. हे अतिक्रमण मोजणी करून काढण्यासाठी भारतीय दलित महासंघाने तहसीलदारांना निवेदन देऊन उपोषण केले होते. त्या अनुषंगाने आज कारवाई झाली. सि.स.नंबर ६५२ मध्ये ३५५.०० चौ.मी.इतके क्षेत्र शासकीय मोजणी नुसार अतिक्रमित झाले होते.त्यामुळे तहसीलदार माधवी शिंदे जाधव यांनी पन्हाळा नगरपरिषदेस अतिक्रमण काढण्याबाबत पत्र दिले. त्यानुसार नगरपरिषदेने सर्व यंत्रणा सज्ज ठेवली. मंगळवारी (ता. २८) पथकाने अतिक्रमित क्षेत्रातील प्रवेशद्वाराचे बांधकाम जेसीबी यंत्राच्या साह्याने पाडून जमीन ताब्यात घेतली. यावेळी हाॅटेलने वनविभाग व पुरातत्त्व विभाग यांच्या हद्दीत केलेले अतिक्रमण हटवावे व तेथील ऐतिहासिक बुरुज खुला करावा; अशी मागणी माजी उपनगराध्यक्ष चेतन भोसले यांनी केली. मोहिमेत प्रशासकीय अधिकारी अमित माने, विश्वास रामाणे, पन्हाळा मंडल अधिकारी जे. आर. गोन्सालवीस, मदतनीस दामुअण्णा कांबळे, भारतीय दलित महासंघचे सदस्य, अमोल कांबळे, दयानंद शिवजातक, तुषार कांबळे, अमोल देसाई, राजू पाटील उपस्थित होते