पन्हाळा तालुक्यात''लाडकी बहिण''योजनेचे नव्वद टक्के उद्दिष्ट पूर्ण

‘लाडकी बहीण’चे नव्वद टक्के उद्दिष्ट पूर्ण
पन्हाळा तालुका; ५७ हजारपैकी ५१ हजार प्रस्ताव दाखल

पन्हाळा, ता. ३१ ः मुख्यमंत्री माझी लाडकी बहीण योजनेचा लाभ रक्षाबंधनापूर्वी दिला जाणार आहे. त्यासाठी पन्हाळा तालुक्याने सत्तावन्न हजारचे उद्दिष्ट ठेवले असून त्यापैकी जवळपास नव्वद टक्के उद्दिष्ट पूर्ण झाले आहे. प्राप्त प्रस्तावांची छाननी करण्याचे काम वारंवार खंडित होणारा वीजपुरवठा व नेटवर्कअभावी संथ गतीने होत आहे.
तालुक्यात २१ ते ६५ वयोगटातील महिलांची संख्या साठ हजार आहे. त्यापैकी ५७ हजार महिलांमधील महिला प्रस्ताव देतील; असा अंदाज आहे. तालुक्यातून आजअखेर ५१ हजार प्रस्ताव दाखल झाले. त्यापैकी ४९ हजार प्रस्ताव ऑनलाईन दाखल झाले आहेत. दोन हजार प्रस्ताव ऑफलाईन दाखल झाले. नियमानुसार प्राप्त प्रस्तावांची तालुका स्तरावर ऑनलाईन छाननी होईल. छाननीनंतरच पात्र प्रस्ताव शासनास जमा केले जाणार आहेत; पण पन्हाळा येथे वीजपुरवठा खंडित होतो. छाननीसाठी आवश्यक नेटवर्क नसते किंवा असले तर स्पीड नाही. त्यामुळे प्रस्तावाची छाननी संथ गतीने होत आहे. प्राप्त झालेल्या प्रस्तावांपैकी ३० तारखेला एका दिवसात साडेतीनशे प्रस्तावांची छाननी झाली.

कोट...
लाडकी बहीण योजनेचे प्रस्ताव दाखल करण्याची अंतिम तारीख ३१ ऑगस्ट आहे. जास्तीत जास्त महिलांनी अर्ज दाखल करून योजनेचा लाभ घ्यावा.
- माधवी शिंदे-जाधव; तहसीलदार, पन्हाळा

चौकट.....
येथे भरता अर्ज
मोबाईलमधील नारीशक्ती ॲप, सामान्य महिला समूह संसाधन व्यक्ती (CRP), बचतगट अध्यक्ष, सचिव, सदस्य, गृहिणी, अंगणवाडीसेविका / मदतनीस, ग्रामसेवक, वॉर्ड अधिकारी व सेतू यांना अर्ज भरता येणार आहेत.