कोथळी येथे गृहमतदानव्दारे जेष्ठ नागरिकांनी बजावला मतदानाचा हक्क.

02283
कोथळीत गृह मतदानाद्वारे
ज्येष्ठांनी केले मतदान

सोनाळी, ता. २ ः गृह मतदानाच्या माध्यमातून निवडणूक आयोगाने वयोवृद्ध व दिव्यांग मतदारांना गृहमतदानाची सुविधा दिली आहे. त्यासाठी विकल्प दिलेल्या मतदारांनी निश्चित तारखांना घरी बसून मतदानाचा हक्क बजावावा, असे आवाहन कोल्हापूर जिल्ह्याचे जिल्हाधिकारी अमोल यडगे यांनी केले आहे.
कोल्हापूर लोकसभा मतदारसंघांतर्गत करवीर विधानसभा मतदारसंघातील कोथळी (ता. करवीर) येथे निवडणूक अधिकारी व कर्मचाऱ्यांनी भेट देऊन गृह मतदान प्रक्रिया पार पाडली. येथील ज्येष्ठ नागरिक महिला मतदार कासुबाई धोंडीराम साळुंखे (वय ८५) व शामा हिरबा धनगर (वय ८६) यांनी आज घरी बसून मतदानाचा हक्क बजावला. कोल्हापूर लोकसभा मतदार संघामध्ये गृह मतदानासाठी प्राप्त विकल्पानुसार मतदार निश्चित केले असून स्वतंत्र मतदान पथके नियुक्त केली आहेत. ही मतदान पथके मतदारांच्या घरी पोहोचून त्यांना मतदानाची सुविधा उपलब्ध करून देत आहेत. या सुविधेमुळे दिव्यांग व ज्येष्ठ मतदारांमध्ये आनंद व समाधान व्यक्त होत आहे.