सरवडे येथील टायपिंग परीक्षा केंद्र अन्यत्र हलविल्यास आंदोलन : परुळेकर

सरवडे येथील टायपिंग परीक्षा केंद्र
अन्यत्र हलविल्यास आंदोलन : परुळेकर
सरवडे, ता. ६ : सरवडे (ता. राधानगरी) येथील टायपिंग परीक्षा केंद्र अन्यत्र न हलवता सरवडे येथेच ठेवावे. अन्यथा ७ जुलै रोजी शिक्षण कार्यालय, कोल्हापूर येथे विद्यार्थ्यांसह तीव्र आंदोलन छेडणार असल्याचा इशारा जनता दल सेक्युलरचे महासचिव शिवाजीराव परुळेकर यांनी दिला.
राधानगरी तालुक्यातील शिवाजीराव खोराटे विद्यालय, सरवडे येथे गेल्या आठ वर्षांपासून टायपिंग परीक्षा केंद्र सुरू आहे. राधानगरी तालुका डोंगराळ असून या विभागात शिक्षण घेत असलेल्या शेकडो विद्यार्थ्यांच्या सोयीसाठी हे जवळचे परीक्षा केंद्र आहे. मात्र, हे परीक्षा केंद्र तालुक्याच्या किंवा मुरगूड या ठिकाणी नेणार असे समजते. हे केंद्र इतर ठिकाणी गेल्यास या परिसरातील विद्यार्थ्यांची गैरसोय होणार आहे. त्यामुळे परीक्षा केंद्र पूर्ववत आहे त्याच ठिकाणी ठेवावे, असे न झाल्यास शिक्षण कार्यालय, कोल्हापूर येथे शेकडो विद्यार्थ्यांसह आंदोलन करणार आहे, अशी माहिती परुळेकर यांनी दिली.